აშშ-ის სახელმწიფო მდივანი ჰილარი კლინტონი საქართველოშია. კლინტონი სომხეთიდან პირდაპირ ბათუმში ჩაფრინდა. აშშ-ის სახელმწიფო მდივანს ბათუმის საერთაშორისო აეროპორტში საქართველოს საგარეო საქმეთა მინისტრი გრიგოლ ვაშაძე და ქართული დელეგაცია, ასევე, აშშ-ის ელჩი საქართველოში ჯონ ბასი და საქართველოს ელჩი აშშ-ში თემურ იაკობაშვილი დახვდნენ.
აშშ-ს სახელმწიფო მდივანი ხვალ ამერიკა–საქართველოს სტრატეგიული პარტნიორობის კომისიის პლენარულ სესიას გახსნის და სხდომის თავმჯდომარე იქნება.
ვიზიტის ფარგლებში ჰილარი კლინტონი საქართველოს პრეზიდენტს, პოლიტიკოსებს და სამოქალაქო სექტორის წარმომადგენლებს შეხვდება.
ორ დღეში აშშ-ს სახელმწიფო მდივანი აზერბაიჯანში გაემგზავრება.
ეს ჰილარი კლინტონის მეორე ვიზიტია საქართველოში. პირველად აშშ-ის სახელმწიფო მდივანი საქართველოს 2010 წლის ივლისში სტუმრობდა.