14 ივნისს, იმ დღეს, როდესაც ვაშინგტონსა და თეირანს შორის "ისტორიული გარღვევა" და შეთანხმება იგეგმებოდა, რეგიონში სიტუაცია დაიძაბა. ისრაელმა ბეირუთში ირანის პროქსი ჰეზბოლას პოზიციებს დაარტყა. ისრაელი ამბობს, რომ ეს საპასუხო ცეცხლია, თუმცა ტრამპი ნეთანიაჰუს კვლავ მწვავედ აკრიტიკებს.
„რატომ უნდა განეხორციელებინა ბიბის ეს წყეული თავდასხმა?! ასე გაბრაზებული არასდროს ვყოფილვარ. მას ეს პირდაპირ ვუთხარი. მას განსჯის არანაირი უნარი არ გააჩნია! ეს მას გარკვევით ვაცნობე“, — განუცხადა ტრამპმა Axios-ს.
აშშ-ს პრეზიდენტი თქმით, მიმდინარე დიპლომატიური ძალისხმევა, რომელიც რეგიონში სტაბილურობის დამყარებას ისახავს მიზნად, ისრაელის ნაბიჯებმა შეიძლება წყალში ჩაყაროს:
„ჩვენ ისტორიული შეთანხმების ზღვარზე ვიყავით. ყველას მოვუწოდებ, სიმშვიდე შეინარჩუნონ და ხელიდან არ გაუშვან მშვიდობის დამყარების ეს უნიკალური შანსი“.
ტრამპის თქმით შეთანხმების ხელმოწერამ მხოლოდ რამდენიმე საათით გადაიწია.
ამავდროულად, თეირანი შეთანხმების ვადებთან დაკავშირებით სკეპტიციზმს ინარჩუნებს. ირანის საგარეო საქმეთა სამინისტროს წარმომადგენლის თქმით:
„არანაირი შეთანხმება ან ხელმოწერის ვადები არ არსებობს. ის, რასაც ჩვენ ვხედავთ, არის მხოლოდ მოლაპარაკებების მცდელობა და არა დასრულებული გარიგება. დოკუმენტის დეტალები ჯერ კიდევ განხილვის საგანია“.
თავის მხრივ, ისრაელის თავდაცვის უწყება პოზიციას არ თმობს და Axios-თან საუბარში იერიშს საპასუხო ზომად აფასებს:
„ისრაელი არ დაუშვებს საკუთარ ტერიტორიაზე შეტევებს. ეს იერიში იყო პირდაპირი პასუხი ჰეზბოლას მიერ ჩრდილოეთ ისრაელის მიმართულებით ნასროლ ჭურვებზე. ჩვენი უსაფრთხოება არცერთი დიპლომატიური გარიგების მძევალი არ გახდება“.
Axios-ის ცნობით, სიტუაცია ვაშინგტონში უკიდურესად დაიძაბა. მოლაპარაკებებში ჩართული ერთ-ერთი მაღალჩინოსანი არსებულ რისკებს ასე აფასებს:
„სიტუაცია იმდენად ფეთქებადსაშიშია, რომ თითოეულმა ინციდენტმა შეიძლება მოლაპარაკებების მაგიდა სამუდამოდ დაშალოს. ჩვენი მთავარი გამოწვევა ახლა ისაა, როგორ მოვახდინოთ რეგიონში ესკალაციის დეესკალაცია ისე, რომ ირანთან მიღწეული პროგრესი არ გაბათილდეს“.
მიუხედავად იმისა, რომ პაკისტანელი და კატარელი შუამავლები კვლავ ცდილობენ პროცესის გადარჩენას, რეგიონში არსებული ესკალაცია დიპლომატიური წარმატების მიღწევას სულ უფრო მეტად ართულებს.
