12 ნოემბერს ისრაელის თავდაცვის სამინისტრომ ხელი მოაწერა შეთანხმებას, რომლის ფარგლებშიც ფინეთი ისრაელისგან საჰაერო თავდაცვის სისტემას "დავითის შურდულს" იყიდის. სისტემის შესყიდვის ღირებულება 317 მილიონი ევრო იქნება.
"დავითის შურდული მსოფლიოში ერთ-ერთი ყველაზე განვითარებული სისტემაა, რომელსაც ბალისტიკური და ფრთოსანი რაკეტების, ასევე დრონებისა და თვითმფრინავების ჩამოგდება შეუძლია. ამ სისტემამ ომში მაღალ-ეფექტური შესაძლებლობები აჩვენა", - ნათქვამია ისრაელის თავდაცვის სამინისტროს განცხადებაში.
აღნიშნულ თავდაცვის სისტემას რაკეტების განადგურება 40-300 კილომეტრიანი რადიუსის ფარგლებში შეუძლია. იგი ისრაელის საჰაერო თავდაცვის მთლიანი სისტემის შუა ფენას წარმოადგენს.
ამ გადაწყვეტილებით, ფინეთი, ისრაელის შემდეგ, პირველი ქვეყანაა, რომელიც საჰაერო თავდაცვის სისტემის "დავითის შურდულის" ოპერატორი გახდება.
