აშშ-ის იუსტიციის დეპარტამენტმა და გამოძიების ფედერალურმა ბიურომ (FBI) ისრაელს მძევლების დახსნის მაღალკვალიფიციური სპეციალისტების დამხარება შესთავაზა.
თანხმობის შემთხვევაში სპეციალისტები ისრაელს ჰამასის ტერაქტების შემდეგ დაკარგული და გატაცებული ამერიკელების მოძებნასა და გადარჩენაში დაეხმარებიან.
"ვაგრძელებთ მუშაობას, რათა დავაბრუნოთ ყველა დაკარგული ამერიკელი, მათ შორის ისინიც, ვისზეც ვფიქრობთ, რომ მძევლად აიყვანეს". – თქვა აშშ-ის გენერალურმა პროკურორმა, მერიკ გარლანდმა.
უახლესი მონაცემებით, ჰამასის თავდასხმებს სულ მცირე 27 ამერიკის მოქალაქე ემსხვერპლა, 14-ის ბედი კი უცნობია.
ღაზის სექტორიდან ჰამასის ისრაელზე მოულოდნელი თავდასხმა 7 ოქტომბერს, ადგილობრივი დროით დილის 7 საათზე დაიწყო, როცა ისრაელის მიმართულებით ტერორისტებმა ასობით რაკეტა ისროლეს, პარალელურად კი სამხრეთით მდებარე ქალაქებში შეიჭრნენ.
თავდასხმა ერთდროულად ხმელეთიდან, ზღვიდან და ჰაერიდან განხორციელდა. ისრაელისთვის ეს სრულიად მოულოდნელი აღმოჩნდა.
თავდასხმის თარიღამდე ერთი დღით ადრე შესრულდა იომ კიპურის ომის (ეგვიპტისა და სირიის ისრაელზე თავდასხმის) 50 წლისთავი - ექსპერტების ნაწილი მიიჩნევს, რომ ეს შემთხვევითობა არ არის.
ჰამასის ტერორისტებმა დახოცეს ისრაელის ასობით მოქალაქე, მათ შორის, ქალები, ბავშვები და მოხუცები.
ტყვედ აიყვანეს ისრაელის ჯარისკაცები და სამოქალაქო პირები. ტერორისტები ტყვეებს, მათ შორის, ბავშვებს არაადამიანურად ეპყრობიან. მათი ნაწილი ღაზის სექტორში ბრბოს თვალწინ, აღლუმით ჩამოატარეს და ვიდეოები გაავრცელეს.
საპასუხოდ ისრაელმა ჰამასის წინააღმდეგ ანტიტერორისტული ოპერაცია "რკინის ხმლების" დაწყება გამოაცხადა და ტერიტორიების გათავისუფლებასთან ერთად ღაზის სექტორზე სარაკეტო იერიშების მიტანა დაიწყო.
8 ოქტომბერს ისრაელმა საომარი მდგომარეობა ოფიციალურად გამოაცხადა. პრემიერმინისტრი ნეთანიაჰუ ამბობს, რომ ჰამასი "ძლევამოსილი შურისგებისთვის" უნდა მოემზადოს. ღაზის სექტორში მცხოვრებლებს ისრაელი ტერიტორიის დატოვებისკენ მოუწოდებს.
