უკრაინის პრეზიდენტის უფროსი მრჩეველი, მიხაილო პოდოლიაკი უკრაინის კონტრშეტევის გეგმასთან დაკავშირებით საიდუმლო დოკუმენტების გავრცელებას გამოეხმაურა. მისი თქმით, რამდენიც არ უნდა ეცადოს მოსკოვმა კონტრშეტევის ჩაშლა, რუსები რეალურ გეგმებს ბრძოლის ველზე იხილავენ.
"სსრკ-ს დაშლის შემდეგ რუსეთის დაზვერვა იმ დონემდე დაეშვა, რომ სოლსბერის შემთხვევისა და 3-დღიანი გეგმების კრახის ჩამორეცხვას ფოტოშოპითა და ვირტუალურ სივრცეში დეზინფორმაციის გავრცელებით ცდილობს. მოსკოვს ძალიან უნდა უკრაინის კონტრშეტევის ჩაშლა. თუმცა რუსები რეალურ გეგმებს სულ მალე ბრძოლის ველზე იხილავენ". - წერს პოდოლიაკი Twitter-ზე.
New York Times-ის ცნობით, Twitter-სა და Telegram-ზე ვრცელდება დოკუმენტები, რომლებიც უკრაინის კონტრშეტევისთვის მოსამზადებელ გეგმასთან დაკავშირებით აშშ-სა და NATO-ს საიდუმლო ინფორმაციას შეიცავს.
New York Times-თან ინტერვიუში სამხედრო ანალიტიკოსებმა აღნიშნეს, რომ დოკუმენტების შინაარსი დიდი ალბათობით შეცვლილია. ეს შესაძლოა მოსკოვის მხრიდან დეზინფორმაციის გავრცელების მცდელობა იყოს, ვინაიდან დოკუმენტში უკრაინის დანაკარგები გადაჭარბებულად არის შეფასებული, ხოლო რუსეთის - პირიქით.
New York Times-ის ინფორმაციით, დოკუმენტებში აღწერილი არაა სად, როდის და როგორ აპირებს უკრაინა კონტრშეტევის წარმართვას, თუმცა მათში ბევრი მინიშნებაა სამხედრო მოქმედებებთან დაკავშირებით.