უკრაინის პრეზიდენტის ოფისის უფროსმა მოადგილემ, იგორ ჟოვკვამ თქვა, რომ ევროკავშირის კრემლის წინააღმდეგ დაწესებული სანქციების მე-6 პაკეტი, რომელიც რუსული ნავთობის იმპორტის ნაწილს კრძალავს, არასაკმარისია, ხოლო სანქციების ტემპი - ძალიან ნელი.
"მე თუ მკითხავთ, სანქციების ტემპი ძალიან ნელი, დაგვიანებული და ნამდვილად არასაკმარისია". - ამბობს იგორ ჟოვკვა.
ჟოკვას თქმით, უკრაინა დასავლეთიდან იარაღის მიწოდების ტემპითაც უკმაყოფილოა.
"კმაყოფილები რომ ვიყოთ, ახლავე დავიწყებდით მარიუპოლის გათავისუფლებასა და დონბასიდან რუსული ძალების განდევნას. ჩვენ დაპირებების გვჯერა". - აღნიშნავს ჟოვკვა.
31 მაისს გავრცელებული ინფორმაციით, ევროკავშირის წევრი ქვეყნების ლიდერები, უკრაინაში რუსეთის შეჭრის პასუხად, მოსკოვისთვის სანქციების მეექვსე პაკეტის დაწესებაზე შეთანხმდნენ, რაც რუსეთიდან ნავთიბის იმპორტის ნაწილობრივ აკრძალვას ითვალისწინებს.
დაწესებული სანქციების მიხედვით, ევროკავშირი რუსული ნავთობის საზღვაო გზით მიღებაზე უარს ამბობს. ამჟამად გამონაკლისი არის მილსადენი დრუჟბა, რომელიც უნგრეთის მთავარი ნავთობმიმწოდებელი ხაზია. ამ გამონაკლისის მეშვეობით, შესრულდა უნგრეთის პრემიერმინისტრის, ვიქტორ ორბანის მოთხოვნა, რომელიც სრულ ემბარგო ეწინააღმდეგება და თვლის, რომ ეს ქვეყნის ეკონომიკას დააზარალებს.
ევროკავშირი ამბობს უარს რუსულ ნედლ ნავთობსა და ნავთობპროდუქტებზე.
ამას გარდა, სანქციების ახალი პაკეტი მოიცავს რუსეთის უმსხვილესი ბანკის, სბერბანკის SWIFT-ის სისტემიდან გარიცხვას, ევროკავშირის ტერიტორიაზე სამი რუსული სამთავრობო არხის მაუწყებლობის შეზღუდვასა და უკრაინაში ომის დანაშაულებზე პასუხისმგებელი პირებისთვის სანქციების ტაწესებას. ომის დანაშაულებზე პასუხისმგებელ პირთა სია მომდევნო დღეებში გამოქვეყნდება.
სანქციების პაკეტი 1 ივნისიდან ამოქმედდება.
როგორც ევროპული საბჭოს პრეზიდენტი, შარლ მიშელი ამბობს, სანქციები დაუყოვნებლივ შეეხება ევროკავშირში იმპორტირებული რუსული ნავთობის 75%-ს, წლის ბოლომდე კი 90%-ს.
