ჩერნობილის ატომურ ელექტროსადგურზე ელექტროენერგიის მიწოდება აღდგა. ინფორმაციას უკრაინის ენერგეტიკის მინისტრი გერმან გალუშენკო ავრცელებს.
"დღეს ეროვნული ენერგეტიკული კომპანიის უკრენერგოს სპეციალისტების, მეცნიერების და ელექტრიკოსების წარმოუდგენელი ძალისხმევის წყალობით, მოხერხდა რუსი ოკუპანტების მიერ მიტაცებულ ჩერნობილის ატომურ ელექტროსადგურზე ელექტროენერგიის მიწოდების აღდგენა" - თქვა გალუშენკომ.
მინისტრის თქმით, ახლა გაგრილების სისტემა კვლავ საშტატო რეჟიმში იმუშავებს სარეზერვო კვების წყაროდან.
"ჩვენი ენერგეტიკოსები ნამდვილი გმირები არიან, მაგრამ ომის აგრესიის პირობებში ბირთვული უსაფრთხოების გმირობით უზრუნველყოფა შეუძლებელია. ამიტომ კიდევ ერთხელ მივმართავ საერთაშორისო პარტნიორებს, ევროკომისიას, გაეროს, ეუთოს, ატომური ენერგიის საერთაშორისო სააგენტოს დაგვეხმარეთ ბირთვული ობიექტების დაცვაში. ახალა უკიდურესად მნიშვნელოვანია მტრის იძულება, დატოვოს ატომური ელექტროსადგური და დაწესდეს 30-კილომეტრიანი
დემილიტარიზებული ზონა უკრაინის ატომური ენერგეტიკის ობიექტების გარშემო" - თქვა გალუშენკომ.
რუსეთმა უკრაინაზე სრულმასშტაბიანი თავდასხმა 24 თებერვალს გამთენიისას, ერთდროულად რამდენიმე დიდი ქალაქის, მათ შორის, კიევის დაბომბვით დაიწყო. ქალაქების დაბომბვამდე სულ რაღაც 20 წუთით ადრე რუსეთის პრეზიდენტმა, ვლადიმირ პუტინმა უკრაინას ომი ვიდეომიმართვით ოფიციალურად გამოუცხადა.
პუტინის მიერ უკრაინისთვის ომის გამოცხადებას წინ უძღოდა დონეცკისა და ლუგანსკის თვითგამოცხადებული რესპუბლიკების მარიონეტული რეჟიმების ფორმალური თხოვნა კრემლისადმი, დახმარებოდნენ "უკრაინული აგრესიის" მოგერიებაში.
რუსეთის სამხედრო ძალები უკრაინას სხვადასხვა მიმართულებით უტევენ. პარალელურად, მსოფლიოს ქვეყნები რუსეთს სხვადასხვა სახის სანქციას უწესებენ.