ჩინეთის სასამართლომ ანტიმონოპოლიური კანონის დარღვევის გამო Alibaba რეკორდული 2.8 მილიარდი დოლარით დააჯარიმა, თუმცა კომპანიის აქციების ფასი საფონდო ბირჟებზე მკვეთრად, თითქმის 7%-ით გაიზარდა.
როგორც წესი, კომპანიის წინააღმდეგ გამოძიების დაწყებას, სასამართლოს მიერ მის გამტყუნებას და დაჯარიმებას საფონდო ბირჟებზე პანიკური ვაჭრობა და აქციების ფასის ვარდნა მოჰყვება ხოლმე.
მიუხედავად ამისა, Alibaba-ს შემთხვევა არღვევს ზოგად კანონზომიერებებს, რაც, ექსპერტების თქმით, საქმის სპეციფიკითაა განპირობებული.
ამერიკის ერთ-ერთი უმსხვილესი საინვესტიციო ბანკის, Morgan Stanley-ს განმარტებით, სასამართლო გადაწყვეტილებითა და რეკორდული ჯარიმით დასრულდა გაურკვევლობის პერიოდი, როცა ინვესტორებმა არ იცოდნენ, თუ რა მომავალი ელოდა კომპანიას.
ექსპერტების თქმით, ინვესტორები ჩინეთის კომუნისტური მთავრობისგან უფრო მწვავე ქმედებებს ელოდნენ, ვიდრე ეს $2.8-მილიარდიანი ჯარიმაა. მათი ნაწილი Alibaba-ს დაშლისა და ჩინეთში ნაწილობრივ აკრძალვის ვარიანტებსაც კი განიხილავდა.
ექსპერტთა ნაწილი ჩინეთის მკაცრ მიდგომას Alibaba-სა და მისი დამაარსებლის, ჯეკ მას წინააღმდეგ პოლიტიკურად მოტივირებულს უწოდებს. მათი თქმით, კომუნისტური მთავრობა სჯის იმ კომპანიებს, რომლებიც არ ემორჩილებიან პარტიულ ნებას და აკრიტიკებენ ჩინეთის მთავრობას.
Alibaba-ს წინააღმდეგ ჩინეთის მთავრობამ გამოძიება მას შემდეგ დაიწყო, რაც კომპანიის აღმასრულებელმა დირექტორმა, ჯეკ მამ ჩინეთის მარეგულირებელი ორგანო და კომუნისტური მთავრობა საჯაროდ გააკრიტიკა.
მისი სიტყვით გამოსვლიდან რამდენიმე დღეში ჯეკ მას Ant Group-ის $37 მილიარდიანი პირველადი საჯარო შეთავაზება (IPO) მთავრობამ შეაჩერა.
2021 წელს კი მამ ჩინეთის უმდიდრესი ადამიანის სტატუსი დაკარგა.
2021 წლის მარტში ჩინეთის მთავრობამ Alibaba-ს ვებბრაუზერი UC Browser დაბლოკა.
ჩინეთის ლიდერმა, სი ძინფინგმა თქვა, რომ ეს ტექნოლოგიური კომპანიების წინააღმდეგ წამოწყებული პროცესის მხოლოდ დასაწყისია და ჩინეთი უფრო მკაცრად მიუდგება ისეთი კომპანიების საკითხს, რომელთაგანაც პოტენციური საფრთხე მომდინარეობს.
