თეოლოგი გიორგი ტიგინაშვილი სოციალურ ქსელში ავრცელებს ფოტოებს, რომლითაც ირკვევა, რომ ნავთლუღის წმ. ბარბარეს ქვემო ეკლესიაში ისტორიული იერსახე განადგურდა. განადგურებულია თავად სუმბათაშვილების მე-19 საუკუნის საფლავები და მათზე აღბეჭდილი წარწერებიც.
ფოტოებთან ერთად ტიგინაშვილი პოსტს აქვეყნებს იმის შესახებ, თუ რა შეიცვალა და განადგურდა ეკლესიაში. როგორც თეოლოგი წერს, ეს ყველაფერი ეკლესიის წინამძღვრის, დეკანოზ ისე არხოზიშვილის ხელმძღვანელობით მოხდა.
"1) აღნიშნული კადნიერებისა და მავნებლობის შედეგად განადგურდა თავადი სუმბათაშვილების მე-19 საუკუნის საფლავები და მათი წარწერები, რაც დიდი ისტორიული დანაკლისია, მით უფრო, რომ ეს ეპიგრაფიკული ძეგლები მეცნიერულად შესწავლილი და ფოტოფიქსირებული არ იყო;
2) მე-18 საუკუნის ნატეხი და რიყის ქვით ნაშენი დარბაზული ეკლესიის ფასადების კედლები მთლიანად დაფარულ იქნა ახალი ქვის (ნიჩბისის ნატეხი ქვა) პერანგით, რითაც სრულად დაიფარა ტაძრის უნიკალური, ისტორიული იერსახე და არქიტექტურა, რაც ასევე უნდა შეფასდეს, როგორც ძეგლის განადგურება და უმძიმესი დაზიანება".
ტაბულამ კითხვით მიმართა კულტურული მემკვიდრეობის ძეგლთა დაცვის სააგენტოს და პასუხს მიღებისთანავე შემოგთავაზებთ.