ზუგდიდში ქართული ოცნების აქტივისტებმა ენმ-ის ოფისის მინები ჩალეწეს. მმართველი გუნდის პარტაქტივის აქცია ოპოზიციური პარტიის ოფისთან ერთი საათის წინ დაიწყო. აქციის მონაწილეთა ნაწილი არაფხიზელ მდგომარეობაში იყო. ადგილზე პოლიცია დაგვიანებით მივიდა.
ენმ-ის წევრის ანი წითლიძის თქმით, მან პოლიცია ჯერ კიდევ გუშინ გააფრთხილა მოსალოდნელი თავდასხმის შესახებ.
"დღესაც რამდენჯერმე დავურეკე პოლიციის უფროსს, პირადად, ფაცაციას და გავაფრთხილე, რომ თავდასხმა იგეგმებოდა. ის, რომ პოლიცია მთელი ოცი წუთის განმავლობაში არ მოვიდა, ნიშნავს იმას, რომ ეს იყო გახარიას და ივანიშვილის შურისძიება ზუგდიდელებზე. პოლიციის პასუხისმგებლობაა ის, რომ ჩვენ აქ დაგვიმტვრიეს შუშები, რომ არა ჩვენი დიდი მოთმინება, ძალიან დიდ ფიზიკურ დაპირისპირებამდე მივიდოდა ეს ყველაფერი" - თქვა წითლიძემ.
ზუგდიდში, ერთიანი ნაციონალური მოძრაობის ოფისთან აქციაზე ზუგდიდის საკრებულოს ერთერთი წევრიც იმყოფებოდა.
"საკრებულოს წევრი ვარ, მერე რა, ძალადობრივი რეჟიმის მობრუნება არ გვინდა და როლანდ ახალაიას დაბრუნება არ გვინდა, მთელი ქალაქია გამოსული" - ამბობს საკრებულოს დეპუტატი მთავარ არხთან.
კითხვაზე, რატომ მივიდნენ აქციაზე და არიან თუ არა საჯარო სამსახურში დასაქმებულები, აქტივისტები შემდეგ პასუხს სცემენ - "აგერ ვსეირნობდი და მოვედი", "მთელი ქალაქი აქ ვართ", "ესენი უნდა ამოიძირკვონ".