ვენესუელადან კოლუმბიაში გადასვლას ათასობით ადამიანი ცდილობს

ვენესუელადან კოლუმბიაში გადასვლას ათასობით ადამიანი ქვეყანაში ხანგძლივი ეკონომიკური კრიზისისაგან თავის დასაღწევად ცდილობს. მათი რიცხვი მას შემდეგ გაიზარდა, რაც გავრცელდა ცნობა, რომ კოლუმბია საზღვარზე კონტროლის გამკაცრებას აპირებს.

საზღვარზე ვიზიტისას კოლუმბიის პრეზიდენტმა, ხუან მანუელ სანტოსმა განაცხადა, რომ უნდა შემოიღონ ახალი ზომები იმისათვის, რომ ვენესუელელმა მიგრანტებმა ქვეყანაში არალეგალურად გადასვლა ვეღარ შეძლონ.

"კოლუმბიას ასეთ სიტუაციაში არასდროს უცხოვრია." "ეს ტრაგედიაა და მინდა გავუმეორე პრეზიდენტ მადუროს: ეს შენი პოლიტიკის ბრალია." თქვა მან.

გავრცელდა სურათები რომლებზეც ასახულია ვენესუელელი ლტოლვილები, რომლებიც კოლუმბიაში გადასვალას სიმონ ბოლივარის ხიდის მეშვეობით ცდილობენ.

კოლუმბიამ და ბრაზილიამ საზღვრებზე დამატებითი ძალები გაგზავნეს. ვენესუელის და კოლუმბიის 2,200 კილომეტრიან საზღვარზე დამატებით 2,000 ჯარისკაცი გაიგზავნება.

გასული 6 თვის მანძილზე ამ ქვეყნებმა ვენესუელადან ოფიციალურად ნახევარ მილიონ მიგრანტზე მეტი შეიფარეს. კოლუმბიის მიგრაციის სამსახურების ცნობით ვენესუელადან კოლუმბიაში უკვე 600,000 ადამიანი გადავიდა რაც ნახევარი წლის წინანდელ მაჩვენებელზე ორჯერ მეტია.

ეკონომიკური კრიზისის ფონზე კარაკასის ქუჩებში გახშირდა ძარცვის და ძალადობის შემთხვევები. Reuters-ის ინფორმაციით, მხოლოდ იანვრის თვეში ვენესუელაში ძარცვის 162 შემთხვევა დაფიქსირდა. გასული წლის იანვარში ეს რიცხვი მხოლოდ 8 იყო.

შეგახსენებთ, რომ ვენესუელაში ჰიპერინფლაციამ ეკონომიკისთვის დამანგრეველ მაჩვენებელს - 440,000%-ს გადააჭარბა. ასეთივე მკვეთრი ტემპებით უფასურდება ვენესუელური ბოლივარიც, გასულ თვეში ვალუტის კურსი 42%-ით დაეცა. დღეისთვის ერთი დოლარი 202,000 ბოლივარი ღირს. ამ გაუფასურების გამო, ვენესუელაში საშუალო ხელფასი თვეში $4 დოლარს გაუტოლდა.

ვენესუელის მთავრობა ეკონომიკურ კრიზისს და საკვებისა თუ მედიკამენტების ნაკლებობას "ეკონომიკურ ომს" აბრალებს, რომელსაც მათი თქმით "იმპერიალისტური ძალები" ეწევიან.

სინამდვილეში კი კრიზისის მიზეზი ქვეყნის მიერ გასული 20 წლის განმავლობაში გატარებული სოციალისტური რეფორმები და საერთაშორისო სანქციები გახდა, რაც საერთაშორისო საზოგადოებამ ვენესუელას ადამიანის უფლებების დარღვევისთვის დაუწესა.

მოსახლეობის განსაკუთრებული პროტესტი ნიკოლას მადუროს მიერ პარლამენტისთვის უფლებების ჩამორთმევას და მთავრობის მხარდამჭერებით დაკომპლექტებული "საკონსტიტუციო ასამბლეის" დაფუძნებისთვის გამართულ არჩევნებს მოჰყვა.

სახელმწიფომ პროტესტის ჩასახშობად სამხედროებიც გამოიყენა, გავრცელებული ინფორმაციით, საპროტესტო აქციებს 164 ადამიანი ემსხვერპლა 15,000 კი დაშავდა.