თბილისში საქართველოს ეკონომიკური აქტივობის ორ მესამედზე მეტია თავმოყრილი. საქსტატის უკანასკნელი მონაცემებით, ქვეყნის საწარმოთა ფინანსური ბრუნვის 72.6% სწორედ თბილისზე მოდის. თბილისი დასაქმებულთა რაოდენობითაც ლიდერობს, აქ კერძო საწარმოებში დასაქმებულთა რაოდენობის 64% მუშაობს. რეგიონებიდან საწარმოთა ბრუნვის მიხედვით მეორე ადგილზე აჭარაა, რაც აჭარაში არსებული საერთაშორისო კომპანიების, პორტისა და სასტუმროების ბრუნვას უკავშირდება.
2017 წლის პირველ კვარტალში ბიზნესის ბრუნვა 19%-ით გაიზარდა და მან 15.2 მილიარდ ლარს მიაღწია. სექტორებიდან ყველაზე მაღალი ბრუნვა შეინიშნება ვაჭრობის - 7 მილიარდი ლარი, დამამუშავებელი მრეწველობისა 1.6 მილიარდი ლარი და მშენებლობის სექტორებში- 1 მილიარდი ლარი.
საწარმოთა ბრუნვის მიხედვით რეგიონების განაწილება:
- თბილისი - 72.6%
- აჭარა - 6.5%
- ქვემო ქართლი - 6.4%
- იმერეთი - 4.5%
- სამეგრელო - ზემო სვნაეთი - 3.2%
- სხვა რეგიონები - 6.8%
ბიზნეს სექტორში დასაქმებულთა რაოდენობა რეგიონების მიხედვით:
- თბილისი - 64.9%
- აჭარა - 9.1%
- იმერეთი - 6.8%
- ქვემო ქართლი - 5.6%
- სამეგრელო - ზემო სვანეთი - 3.9%
- სხვა რეგიონები 10%
კერძო სექტორში დასაქმებული ადამიანების რაოდენობა 2017 წლის პირველი კვარტლისთვის 605 ათას ადამიანს შეადგენს, რაც 2016 წლის მაჩვენებელთან შედარებით 30 ათასით მეტია. დასაქმებულთა მთლიანი რაოდენობის 36,0% მსხვილ ბიზნესზე მოდის, 22,1% - საშუალო, ხოლო დარჩენილი 41,9% - მცირე ბიზნესზე.
ბიზნესში დასაქმებული 605 ათასი ადამიანიდან დაქირავებული (კონტრაქტით დასაქმებული) ადამიანების რაოდენობა 570 ათასია. ბიზნეს სექტორში დაქირავებულთა რაოდენობა წინა წელთან შედარებით 5%-ით არის გაზრდილი.
2017 წლის პირველ კვარტალში საშუალო თვიური ხელფასი ბიზნეს სექტორში 1024,0 ლარს გაუტოლდა (გასული წლის შესაბამისი პერიოდის მაჩვენებელთან შედარებით გაზრდილია 101,6 ლარით).
