პაატა რატიანი: რატომ მიდიან სამკურნალოდ უცხოეთში

თითოეულ ჩვენგანს ერთხელ მაინც დასჭირვებია მიემართა ექიმისათვის - კონსულტაციის, დიაგნოსტიკის ან მკურნალობის მიზნით. საერთაშორისო ხარისხის სამედიცინო მომსახურების მისაღებად კი ბევრი საქართველოს მოქალაქე მზადაა საზღვარგარეთ გაემგზავროს.საქართველოში, სამწუხაროდ, ექიმისა და პაციენტის ურთიერთობის, მედიკამენტების მოხმარების, კოლეგა მედიკოსების თანამშრომლობის, პროფესიული ეთიკისა და სხვა მსგავს საკითხთა კულტურა სერიოზულ პრობლემებს განიცდის. პაციენტები ხშირად არ მიმართავენ ექიმებს დროულად, ადგილი აქვს თვითმკურნალობას, წამლების უსისტემო მოხმარებას. დამკვიდრებული მავნე პრაქტიკაა სხვადასხვა სპეციალისტებთან სიარული პირადი სიმპათია/ანტიპათიების თუ ახლობლებში ყურმოკრული ჭორების მიხედვით. ექიმები ხშირად  ერთმანეთთან კოორდინაციაში არ არიან. ეს იწვევს არაორგანიზებულობას, არათანმიმდევრულ მკურნალობას და საბოლოო ჯამში კი სამედიცინო მომსახურების ხარისხის მნიშვნელოვან დაწევას.

ზოგადად, ბევრი არაა იმ ქვეყანათა რიცხვი, რომელთაც ძალუძთ გამართული და თანამედროვე ჯანდაცვის სისტემებით დაიკვეხნონ. ობიექტურები ვიყოთ და ავღნიშნოთ, რომ თანამედროვე და ძლიერი სამედიცინო სკოლები, კლინიკები და მაღალი დონის სამედიცინო მომსახურება საკმაოდ ძვირადღირებული სიამოვნებაა და მისი მიღწევა ეკონომიკურად სუსტ ქვეყნებში წარმოუდგენელი ამოცანაა. შესაბამისად, მზარდია ქვეყნებს შორის სამედიცინო მომსახურების პარამეტრების დისბალანსი. ეს, თავის მხრივ, ჯანდაცვის გლობალიზაციის პირობებში სამედიცინო ტურიზმის ინდუსტრიის დიდი ტემპებით განვითარებას იწვევს.

მსოფლიოს მასშტაბით შეიძლება გამოვყოთ 5 ძირითადი მიზეზი, რაც პაციენტების საზღვარგარეთ გამგზავრებას განაპირობებს:

1.  ფასი (თითქმის ყოველთვის მოიძებნება საჭირო პროცედურა სადმე უფრო იაფად);

2. სერვისი (სპეციალურად მათთვის შექმნილი კომფორტული გარემო იზიდავს უცხოელ პაციენტებს);

3. სამედიცინო მომსახურების ხარისხი (უფრო მაღალი დონის სამედიცინო პროცედურები - ქართველი პაციენტებისათვის ყველაზე მნიშვნელოვანი ფაქტორია);

4. ხელმისაწვდომობა  (ისეთი მომსახურების სახეების არსებობა, რაც პაციენტებს თავიანთ სამშობლოში არ გააჩნიათ);

5. ტურიზმი (მოგზაურობისა და მკურნალობის შეთავსება).

 ამ ფაქტორებიდან ჩვენი მოქალაქეებისათვის ყველაზე მნიშვნელოვანია სამედიცინო მომსახურების უკეთესი ხარისხი და ასევე, ისეთი მომსახურების სახეების არსებობაა, რაც საქართველოში ჯერჯერობით ფიზიკურად ვერ ხორციელდება. ჩვენთვის ყველა სხვა ფაქტორი ამ ეტაპზე მეორეხარისხოვანია. თუმცა არსებობენ ქვეყნები, სადაც სწორედ ეს სხვა ფაქტორები წარმოადგენენ სამედიცინო ტურიზმის ძირითად განმაპირობებელ მიზეზებს. მაგალითად, ამერიკელი პაციენტები იტარებენ ქირურგიულ ოპერაციებს კოსტა-რიკაში მათი მნიშვნელოვანი სიიაფის გამო, გერმანელები სტუმრობენ აღმოსავლეთ ევროპის ქვეყნებში დენტალურ კლინიკებს (იმავე მიზეზით), ნორვეგიელები მოგზაურობენ თურქეთში კომფორტული სერვისისათვის (მათთან ხშირია რიგები რიგ სამედიცინო პროცედურებზე) და ა.შ.

სამედიცინო ტურიზმის ინდუსტრიის სწრაფ განვითარებას განსაკუთრებით შეუწყო ხელი გლობალიზაციამ. გამარტივებული გადაადგილება ხელმისაწვდომს ხდის ადამიანებისათვის მოგზაურობას. გაიაფდა ავიაგადამყვანი კომპანიების მომსახურება - ბევრია ე.წ. Low Cost ავიაკომპანიები. ფრენების სიხშირე იმდენად გაიზარდა, რომ ადამიანებს შეუძლიათ თავისუფლად შეარჩიონ ბილეთები არა მხოლოდ ფასის, არამედ დროისა და მარშრუტის მიხედვითად. მრავალი მიმართულებით საზღვრების გადაკვეთა გაიოლებულია ან სულაც უვიზოა. ვიზების შემთხვევებშიც პაციენტები სარგებლობენ ცალკე, დაჩქარებული და შედარებით მარტივი პროცედურით.