სამართალდამცველებმა უცხო ქვეყნის მოქალაქეთა პლასტიკური ბარათებიდან დიდი ოდენობით ფულადი თანხის მართლსაწინააღმდეგო მისაკუთრების ბრალდებით, თბილისში მცხოვრები, წარსულში თაღლითობისთვის ნასამართლევი გიორგი ს. დააკავეს. შსს-ს ცნობით, გიორგი ს. ავტოსამრეცხაოს და საავტომობილო ზეთების მაღაზიის მფლობელი და დირექტორი იყო. მან ერთ-ერთ ბანკთან გააფორმა ხელშეკრულება და სამუშაო ადგილზე დააყენა ბანკის პოს-ტერმინალი.
"2014 წლის 14 ოქტომბერს ტერმინალის საშუალებით ჩატარებული მართლსაწინააღმდეგო ქმედება გამოვლინდა. კერძოდ, ერთი საათის განმავლობაში დაფიქსირდა 9 საბანკო ოპერაციის მცდელობა, რომელთაგან წარმატებულად 2 განხორციელდა. საბანკო ოპერაციების მცდელობა ჩინეთის რესპუბლიკის 1 პლასტიკური ბარათის და ამერიკის შეერთებული შტატების 8 პლასტიკური ბარათის მონაცემებით ჩატარდა. წარმატებით განხორციელებულმა საბანკო ოპერაციებმა ჯამში 13 000 ლარი შეადგინა. წარმატებით განხორციელებული ორი ტრანზაქციიდან, ერთ შემთხვევაში განაღდდა 4 200 ლარი, ხოლო მეორე შემთხვევაში – 8 800 ლარი. დადგინდა, რომ პლასტიკური ბარათები, საიდანაც თანხები მოიხსნა, რეალურმა მფლობელებმა დაკარგულად გამოაცხადეს. ბრალდებულის მიერ ჩადენილი მართლსაწინააღმდეგო ქმედებით, აღნიშნულ ბანკს დიდი ოდენობით მატერიალური ზიანი მიადგა", - აცხადებს შსს.
გამოძიება არაერთგზის ჩადენილი, დიდი ოდენობით სხვისი მოძრავი ნივთის ფარულად დაუფლების და მართლსაწინააღმდეგოდ მისაკუთრების ფაქტზე მიმდინარეობს (საქართველოს სსკ-ის 177-ე მუხლის მე-2 ნაწილის „ბ“ ქვეპუნქტით და მე-4 ნაწილის „ბ“ ქვეპუნქტით). გამოძიებას ცენტრალური კრიმინალური პოლიციის დეპარტამენტის მეორე მთავარი სამმართველოს კიბერდანაშაულთან ბრძოლის სამმართველო აწარმოებს.
