კახეთის საინფორმაციო ცენტრის ინფორმაცია, რომ ახმეტის მუნიციპალიტეტის გამგეობამ პრემიერმინისტრ ირაკლი ღარიბაშვილის სიმამრის თამაზ თამაზაშვილის, კახეთის გუბერნატორის ირაკლი შიოლაშვილის და ახმეტის მაჟორიტარი დეპუტატის ზურაბ ზვიადაურის მასპინძლობისთვის, 2014 წლის 4 აპრილს, რესტორანში 2350 ლარი დახარჯა და ეს თანხა ადგილობრივი ბიუჯეტიდან იყო გამოყოფილი, საპარლამენტო უმრავლესობის წევრ ზაქარია ქუცნაშვილისთვის უცნობია, თუმცა, მისი თქმით, წარმომადგენლობითი ხარჯები ყველა მუნიციპალიტეტს გააჩნია და საგადასახადო კოდექსი უშვებს საჯარო და კერძო სამართლის პირებისათვის საერთო შემოსავლის 1%-მდე წარმომადგენლობით ხარჯებში დახარჯვის უფლებას.
”არ მაქვს ინფორმაცია, მაგრამ მინდა გითხრათ, რომ წარმომადგენლობითი ხარჯები ყველა მუნიციპალიტეტს გააჩნია, ყველა ადმინისტრაციულ ორგანოს გააჩნია და ყველა კერძო კომპანიას გააჩნია. პირდაპირ საგადასახადო კოდექსი უშვებს საჯარო და კერძო სამართლის პირებისათვის საერთო შემოსავლის 1%-მდე წარმომადგენლობით ხარჯებში დახარჯვის უფლებას. ანუ ეს არის კანონიერი უფლება, რომელიც აღიარებულია, როგორც საჯარო, ასევე კერძო სამართლის პირებისათვის”, - თქვა ქუცნაშვილმა.
კახეთის საინფორმაციო ცენტრის მიერ ახმეტის მუნიციპალიტეტის გამგეობიდან გამოთხოვილი ოფიციალური დოკუმენტაციის მიხედვით, სარესტორნე მომსახურებისთვის თანხა ინდმეწარმე ომარ ნონიაშვილს ჩაერიცხა.
კახეთის საინფორმაციო ცენტრმა მუნიციპალიტეტის გამგეობიდან მოითხოვა ინფორმაცია, რა იყო სტუმრების ვიზიტის მიზანი, ვახშმის მენიუ, სტუმრების ჯგუფის შემადგენლობა, თუმცა, მის გაცემაზეც უარი ეთქვა.
საინფორმაციო ცენტრის ცნობით, ახმეტის მუნიციპალიტეტის გამგეობის საფინანსო – ეკონომიკური სამსახურის უფროსის არსენ ბუღრიძის განმარტებით, საფინანსო სამსახურში არ აქვთ ინფორმაცია სტუმრების ვინაობის, ვიზიტის მიზანის და მენიუს შესახებ.
”გამგებლის ბრძანებით დაგვევალა თანხის გადარიცხვა ინდმეწარმე ომარ ნონიაშვილისთვის 2350 ლარის ოდენობით და გადავრიცხეთ. „ომარ ნონიაშვილისგან“ მხოლოდ ზედნადები გვაქვს მიღებული, სადაც მითითებულია, რომ თანხა სარესტორნე მომსახურებისთვის უნდა ჩაგვერიცხა“, – აღნიშნა არსენ ბუღრიძემ.
ინდმეწარმე ომარ ნონიაშვილმა კი კახეთის საინფორმაციო ცენტრს განუმარტა, რომ 4 აპრილს გამგეობიდან შემდეგი შეკვეთა მიიღო: 41 შემწვარი წიწილა; 41 ღორის მწვადი, გოჭის ხორცი, ცხვრის ჩაქაფული, ხბოს ხორცის ჩაშუშული, ალაზნის ლოქო, სალათები, პური, ღვინო და ა.შ. კითხვაზე, რატომ არ მიაწოდა გამგეობას მენიუ, ომარ ნონიაშვილმა აღნიშნა, რომ მისთვის მენიუს მიწოდება და პროდუქტის გაშიფვრა არ მოუთხოვიათ.
კახეთის საინფორმაციო ცენტრის ინფორმაციით, პრემიერმინისტრ ირაკლი ღარიბაშვილის სიმამრი, პოლიციის გენერალი თამაზ თამაზაშვილი, 4 აპრილს, ახმეტაში, ქართულ ჭიდაობაში საქართველოს პირველობას, ქართული ჭიდაობის ეროვნული ფედერაციის საპატიო პრეზიდენტის სტატუსით დაესწრო. თამაზ თამაზაშვილი 1998-1999 წლებში დაბადებულ ჭაბუკთა შორის გამართული შეჯიბრის მთავარი მსაჯი იყო. პრემიერის სიმამრს თან ახლდნენ კახეთის გუბერნატორი ირაკლი შიოლაშვილი და შს კახეთის სამხარეო მთავარი სამმართველოს უფროსი ბესიკ ამირანაშვილი, ასევე ახმეტის მაჟორიტარი დეპუტატი ზურაბ ზვიადაური.
ოფიციალური ინფორმაციით, 2013 – 2014 წლებში ახმეტის მუნიციპალიტეტის გამგეობის წარმომადგენლობითი ხარჯებიდან 74 298 ლარი დაიხარჯა სარესტორნე მომსახურებისთვის, საჩუქრების შესაძენად, სტუმრების საპატივსაცემოდ.
კახეთის საინფორმაციო ცენტრის ცნობით, ”871 ლარია დახარჯული ბიუჯეტიდან 2 მაისს, სოფელ ქვემო ალვანში თუშური ფოლკლორის საღამოზე მოწვეული სტუმრების გამასპინძლებისათვის. თანხა სარესტორნე მომსახურებისათვის შპს „ჭადარს“ ჩაერიცხა. სტუმრების ვინაობის შესახებ ინფორმაცია და მენიუ გამგეობიდან ამ შემთხვევაშიც ვერ მივიღეთ იმ მიზეზით, რომ არ აქვთ. 2014 წელს 1468 ლარი აქვს გამგეობას გადახდილი ინდმეწარმე მარიამ ბექურიძისთვის. დანიშნულებაში მითითებულია, რომ სტუმრებისთვის კვების პროდუქტები შეიძინეს. გაურკვეველია ,რა პროდუქტები და ვისთვის შეიძინა გამგეობამ. 7 მარტს, ახმეტაში სტუმრად მყოფი პარლამენტის წევრების საქეიფოდ ინდმეწარმე ზაზა გონჯილაშვილის რესტორანს გამგეობამ 400 ლარი ჩაურიცხა. სტუმრების ვინაობა და მენიუ გამგეობამ არ მოგვაწოდა.
კახეთის საინფორმაციო ცენტრი ასევე აღნიშნავს, რომ 1 ივნისს, ბავშვთა დაცვის საერთაშორისო დღის აღნიშვნასთან დაკავშირებით, გამგეობამ ინდმეწარმე მ.კობახიძეს პიროტექნიკის შესაძენად 1500 ლარი ჩაურიცხა. ბავშვთა დაცვის დღე ახმეტაში 1–ლი ივნისის ნაცვლად 2 ივნისს აღნიშნეს. 2 ივნისს არის დაბადებული ქართული ოცნებიდან ახმეტის მაჟორიტარი დეპუტატი ზურაბ ზვიადაური. დეპუტატის საპატივსაცემოდ ახმეტაში 2 ივნისს მომღერლებმა იმღერეს, საღამო კი რესტორანში გაგრძელდა. ახმეტის საფინანსო – საბიუჯეტო სამსახურში კახეთის საინფორმაციო ცენტრს განუცხადეს, რომ გუშინდელ ღონისძიებასთან დაკავშირებით ,მათთვის თანხის გამოყოფის მოთხოვნის შესახებ ჯერ არ მიუმართავთ.
კახეთის საინფორმაციო ცენტრი იტყობინება, რომ 2013 წლის 4 ოქტომბერს, ბიძინაობის დღესასწაულზე სტუმრად მყოფი პირების რესტორანში გამასპინძლებისათვის ინდმეწარმე ზაზა გონჯილაშვილს გამგეობამ ჩაურიცხა 4500 ლარი. იგივე რესტორანს 9 ოქტომბერს ისევ ბიძინაობის დღესასწაულზე სტუმრად მყოფი პირების მასპინძლობის მიზეზით 470 ლარი.
”შპს ელგის რესტორანს ჩაერიცხა 1036 ლარი სოფელ ბირკიანში საბავშვო ბაღის გახსნასთან დაკავშირებით მიწვეული სტუმრების საქეიფოდ; 18 ოქტომბერს 1000 ლარი ჩაერიცხა ინდმეწარმე „ზაზა გონჯილაშვილის“ რესტორანს ლაგოდეხის ნაკრძალში ჩატარებული ღონისძიების მონაწილეთა საქეიფოდ. 25 ოქტომბერს ზაზა გონჯილაშვილის რესტორანში იქეიფეს საპარლამენტო უმრავლესობის წევრებმა, რის გამოც ბიუჯეტიდან 625 ლარი გადაირიცხა. 1509 ლარი დაიხარჯა ახმეტაში მშენებარე ეკლესიის დასახმარებლად გამართული საქველმოქმედო კონცერტის მონაწილე მომღერლების გამასპინძლებაზე ინდმეწარმე ნიკოლოზ კობიაშვილის რესტორანში. ნიკოლოზ კობიაშვილის რესტორანს გამგეობამ 27 დეკემბერს ჩაურიცხა 394 ლარი სპორტის სამინისტროს თანამშრომლების საქეიფოდ; 27 დეკემბერს 480 ლარი ჩაერიცხა ზაზა გონჯილაშვილის რესტორანს ძიუდოს ფედერაციის წარმომადგენლების საქეიფოდ”, - წერს კახეთის საინფორმაციო ცენტრი.
