ინტერ რაო ეესი ქართველი მაღალჩინოსნებისთვის ქრთამის მიცემასთან დაკავშირებით, კომპანიის მიმართ გამოთქმული ბრალდების შესახებ განცხადებას ავრცელებს.
განცხადებაში ნათქვამია, რომ საერთაშორისო იურიდიული კომპანია DLA PIPER-ის ადვოკატების ინფორმაციით, რომლებიც ენერგოჰოლდინგის ინტერესებს წარმოადგენენ, ''აღნიშნული განცხადება ოფიციალურად საქართველოს პროკურატურამ 22 დეკემბერს, სასამართლო პროცესზე გააკეთა'', რის შედეგადაც თელასის გენერალური დირექტორი დევი კანდელაკი გირაოს სანაცვლოდ გაათავისუფლეს.
"საქართველოს პროკურატურამ ვერ დაინახა განსხვავებები წინასწარი საგადასახადო რეგულირების პროცედურებს შორის, რომელიც აუცილებელია 2011-2012 წლებში საქართველოს ხელისუფლებასა და თელასს შორის დავალიანების რესტრუქტურიზაციაზე მიღწეული შეთანხმების რეალიზებისთვის და უშუალოდ საგადასახადო შეთანხმებას შორის, რომელსაც ჯგუფის საწარმოებთან ხელი შესაძლოა, მხოლოდ 2013 წელს მოეწეროს. ორივე პროცედურა საჯაროა, გათვალისწინებულია საქართველოს კანონმდებლობით და ეფუძნება გადასახადის გადამხდელის ოფერტას, რის გამოც წინადადება საგადასახადო შეთანხმების შესახებ კომპანიამ წამოაყენა. საგადასახადო ვალდებულებების ფიქსაციის მიზანი, ისევე როგორც მმართველობითი საწარმოო ხარჯების ოპტიმიზაციისა, იყო ტარიფების გრძელვადიანი განსაზღვრა და მათი შესაძლო შემცირება საბოლოო მომხმარებლისთვის, მათ შორის მოსახლეობისთვის", - ნათქვამია განცხადებაში.
ინტერ რაო ეესი აცხადებს, რომ პროკურატურის განცხადება კომპანიისთვის ათობით მილიონი ლარის ოდენობის გადასახადის პატიების შესახებ გამოგონილია, რადგან ''პროკურატურის მხრიდან სადავო საკონსულტაციო შეთანხმების დადებისას საგადასახადო ორგანოების გადაწყვეტილება გადასახადის დარიცხვის შესახებ არ არსებობდა''.
"ამასთან დაკავშირებით ჯგუფი ინტერ რაო ეესი არ გამორიცხავს, გადაიხედოს 2012 წლის დასაწყისში მიღწეული შეთანხმება თელასის დავალიანების რესტრუქტურიზაციასთან დაკავშირებით მაჟორიტარულ აქციონერთა წინაშე. ინტერ რაო ეესი ასევე აცხადებს, რომ არსებულ პირობებში საგადასახადო საკითხების დარეგულირება ტარიფების გადახედვის აუცილებელი პირობაა", - ნათქვამია განცხადებაში.
შეგახსენებთ, 19 დეკემბერს ფინანსთა სამინისტროს საგამოძიებო სამსახურმა ნიკა გვარამაია, ალეკო ხეთაგური, თელასის გენერალური დირექტორი დევი კანდელაკი და კიდევ 3 პიროვნება დააკავა. ბრალდების მხარის მტკიცებით, მათ ქრთამის მიღების სქემა შეიმუშავეს. პროკურატურის ვერსიის მიხედვით, თელასი და კიდევ 3 კომპანია საკონსულტაციო კომპანიის დაიქირავებდა. რეალურად კი კონსულტანტისთვის გადაცემული ფული მაღალჩინოსნების ხელში მოხვდებოდა.
