კოალიცია ქართული ოცნების ლიდერი ბიძინა ივანიშვილი, სტიქიის შედეგად დაზარალებულთა დასახმარებელად 10 მილიონ ლარს რიცხავს. კოალიციის ლიდერი აღნიშნულ თანხას, სასამართლოს მიერ მისთვის დაკისრებული ჯარიმის გადასახდელად მითითებულ ანგარიშზე გადარიცხავს. ამის შესახებ განცხადება ბიძინა ივანიშვილმა დღეს გაავრცელა.
,,ყველასთვის კარგად ცნობილი გარემოებების გამო მე არ მაქვს შესაძლებლობა პირადად დავეხმარო სტიქიური უბედურებით დაზარალებულ ათასობით ადამიანს - ხელისუფლება მედიკამენტების მიწოდებასაც კი ამომრჩევლის მოსყიდვად ჩამითვლის. ამასთანავე, ხელისუფლებამ მე სრულიად უკანონოდ დამაკისრა ათეულობით მილიონი ლარის გადახდა ბიუჯეტის სასარგებლოდ და ასევე უკანონო გზებით ცდილობს სხვისი ქონების ხარჯზე ამ თანხების ამოღებას. შექმნილ ვითარებაში მე მივიღე გადაწყვეტილება და ამ ეტაპზე 10 მილიონ ლარს ვრიცხავ სასამართლოს მიერ მითითებულ საბიუჯეტო ანგარიშზე. სტიქიით მიყენებული ზარალის სრულად დათვლის შემდეგ სახელმწიფო ბიუჯეტში ამავე მექანიზმის გამოყენებით გადავრიცხავ იმდენ თანხას, რამდენიც საჭირო გახდება.’’-ნათქვამია განცხადებაში.
19 ივლისის სტიქიის შედეგად ყველაზე მეტად დაზარალდა თელავი, გურჯაანი, ასევე ყვარლისა და ლაგოდეხის რაიონების ნაწილი.
გუშინ გამართულ პრესკონფერენციაზე, ქართული ოცნების პრესსპიკერმა მაია ფანჯიკიძემ განაცხადა, რომ კოალიცია სურვილს გამოთქვამს, პრეზიდენტის ინიციატივით შექმნილ ზარალის სალიკვიდაციო შტაბის მუშაობაში აქტიური მონაწილეობა მიიღოს.
