31 ოქტომბერს, ღამით, უკრაინამ რუსეთის ორიოლის, ვლადიმირისა და იაროსლავლის ოლქებში არსებულ ენერგოობიექტებზე მასშტაბური იერიში მიიტანა. ინფორმაციას რუსი ოფიციალური პირები და რუსული Telegram-არხები ავრცელებენ.
შეტევების სამიზნე იყო ორიოლის თბოელექტროსადგური (TPP) - რეგიონის ყველაზე დიდი ელექტროენერგიის გამომმუშავებელი ობიექტი; ვლადიმირის ელექტროსადგური - რუსეთის ენერგეტიკული ინფრასტრუქტურის მნიშვნელოვანი ცენტრი; და ნოვო-იაროსლავლის ნავთობგადამამუშავებელი ქარხანა - ჩრდილოეთ რუსეთის უდიდესი ნავთობის საწარმო.
Telegram-არხ Astra-ს მიერ გამოქვეყნებული კადრების მიხედვით, ორიოლის სადგურზე ორი დარტყმა განხორციელდა, რის შედეგადაც ქალაქში ელექტროენერგია გაითიშა. Astra-ს ინფორმაციით, ადგილობრივებმა განაცხადეს, რომ თავდასხმის ხმა დრონების მსგავსად არ ჟღერდა და შესაძლოა, რომ უკრაინამ სადგურის წინააღმდეგ რაკეტები გამოიყენა.
იაროსლავლში აფეთქებები ნოვო-იაროსლავლის ნავთობგადამამუშავებელ ქარხანასთან დაფიქსირდა. აღნიშნული ქარხანა წლიურად 15 მილიონ ტონა ნავთობს გადაამუშავებს და სიმძლავრით რუსეთში მეხუთე ადგილზეა.
