მთელი ღამის განმავლობაში რუსეთმა დრონებისა და რაკეტების მეშვეობით მასობრივი იერიში მიიტანა კიევზე, რის შედეგადაც, სულ მცირე, 23 ადამიანი დაშავდა, ასევე დაზიანდა სარკინიგზო ინფრასტრუქტურა და დედაქალაქში ცეცხლი გაუჩნდა მანქანებსა და შენობებს.
უკრაინის საჰაერო ძალების ინფორმაციით, რუსეთის მხრიდან იერიშების რამდენიმე ტალღის ფონზე, დედაქალაქში საჰაერო განგაშის სირენები რვა საათზე მეტხანს ისმოდა. ჯამში რუსეთმა უკრაინის მიმართულებით 539 დრონი და 11 რაკეტა გაუშვა. ამასთან, საჰაერო ძალებმა განაცხადა, რომ ადგილობრივი დროით 12:30 საათზე რუსეთმა კიევისკენ გაუშვა ბალისტიკური რაკეტაც.
"იერიშების მთავარი სამიზნე უკრაინის დედაქალაქი, ქალაქი კიევი იყო!" განაცხადა უკრაინის საჰაერო ძალებმა Telegram-ზე გავრცელებულ პოსტში.
კიევის მერის, ვიტალი კლიჩკოს ინფორმაციით, დაშავებულთაგან 14 პირი საავადმყოფოში გადაიყვანეს.
კიევზე რუსეთის მასობრივ იერიშამდე რამდენიმე საათით ადრე აშშ-ს პრეზიდენტ დონალდ ტრამპსა და ვლადიმირ პუტინს შორის სატელეფონო საუბარი გაიმართა, რომელიც თითქმის ერთ საათს გაგრძელდა.
რუსეთის პრეზიდენტის მრჩევლის განცხადების მიხედვით, პუტინმა ტრამპს უთხრა, რომ რუსეთი არ გადაუხვევს თავის მიზნებს, რომლებიც უკრაინაში კონფლიქტის ძირეული მიზეზების აღმოფხვრას უკავშირდება.
უშაკოვის თქმით, ტრამპსა და პუტინს არ უსაუბრიათ სტამბოლში შესაძლო სამმხრივი მოლაპარაკების თარიღის შესახებ და არც მათ შორის შეხვედრის შესაძლებლობა არ განუხილავთ.
მოგვიანებით, ტრამპმა რეპორტიორებს კითხვაზე, მიაღწია თუ არა მან რაიმე პროგრესს უკრაინაში ომის დასრულებაზე პუტინთან გამართულ სატელეფონო საუბარში, ტრამპმა უპასუხა, რომ რუსეთის ლიდერთან მას არანაირი პროგრესი არ ჰქონია.
