თეთრი სახლის პრესმდივანმა კეროლაინ ლივიტმა სოციალურ ქსელ X-ში პოსტი გამოაქვეყნა, რომელშიც ცოტა ხნით ადრე, პიტ ჰეგსეთის შეცვლასთან დაკავშირებით მედიაში გავრცელებული ინფორმაცია უარყო.
"ეს არის სრულიად ყალბი ამბავი, დაწერილი ერთ-ერთ ანონიმურ წყაროზე დაყრდნობით, რომელსაც წარმოდგენა არ აქვს რაზე ლაპარაკობს". – წერს ლივიტი პოსტში.
21 აპრილს, მედია National Public Radio-მ წყაროზე დაყრდნობით დაწერა, რომ პენტაგონის ხელმძღვანელის პოსტზე, ტრამპის ადმინისტრაცია პიტ ჰეგსეთის შემცვლელს ეძებს.
გამოცემა ჰეგსეთით უკმაყოფილების მიზეზად მესენჯერ Signal-ში სახელმწიფო მნიშვნელობის საიდუმლო ინფორმაციის გავრცელებას ასახელებს.
NPR-ის სტატიამდე რამდენიმე საათით ადრე, New York Times ოთხ წყაროზე დაყრდნობით წერდა, რომ აშშ-ს თავდაცვის მდივანმა, პიტ ჰეგსეთმა 15 მარტს Signal-ის მეორე ჩატში, რომლის წევრებიც მისი ცოლი, ძმა და პირადი ადვოკატი იყვნენ, იემენში დაგეგმილი ავიადარტყმების შესახებ დეტალური ინფორმაცია გააზიარა.
