ევროპულმა საბჭომ უკრაინისთვის, Ukraine Facility პროგრამის ფარგლებში, 3.5 მილიარდი ევროს დახმარების ახალი ტრანში დაამტკიცა.
ეს არის მესამე ტრანში, რომელიც Ukraine Facility-ის ფარგლებში კიევმა მიიღო. უკრაინამ ამ თანხის მისაღებად ევროპული საბჭოს მიერ დაწესებული 13 მოთხოვნა შეასრულა, მათ შორის:
- განახლებადი ენერგიის გამოყენების ზრდის ხელშეწყობის რეფორმები;
- ენერგეტიკული რეგულატორის ავტონომიის გაზრდა;
- საზღვრის კვეთის პროცედურების გამარტივება ევროკავშირის სტანდარტების შესაბამისად;
- სოფლის მეურნეობისა და სოფლის რაიონების განვითარების სტრატეგიის მიღება;
- სტრატეგიული და კრიტიკული ნედლეულის ჩამონათვალზე მუშაობის გაგრძელება.
„უკრაინის გეგმა ასახავს ქვეყნის აღდგენის, რეკონსტრუქციისა და მოდერნიზაციის ხედვას, ასევე რეფორმების განხორციელების ვადებს, რომლებიც დაგეგმილია ევროკავშირში გაწევრიანების პროცესის ფარგლებში მომდევნო ოთხი წლის განმავლობაში,“ – ნათქვამია ევროპული საბჭოს განცხადებაში.
Ukraine Facility არის ევროკავშირის ფინანსური პროგრამა, რომელიც მიზნად ისახავს უკრაინის მხარდაჭერას ომის დროსა და შემდგომი აღდგენის პროცესში.
Ukraine Facility-ის პროგრამა ერთი წლის წინ ამოქმედდა და ამ მესამე ტრანშის ჩათვლით, უკრაინას მის ფარგლებში, გრანტებისა და სესხების სახით, თითქმის 20 მილიარდი ევროს დახმარება აქვს მიღებული.
