CNN-ის ცნობით, ტერორისტულმა ორგანიზაცია ისლამურმა სახელმწიფომ (ISIS) მოსკოვში, საკონცერტო დარბაზ Crocus City Hall-ში მომხდარ ტერაქტზე პასუხისმგებლობა აიღო.
პასუხისმგებლობის აღების შესახებ ISIS-ის მოკლე განცხადება ტერორისტულ დაჯგუფებასთან აფილირებულმა სააგენტო Amaq-მა Telegram-ის არხზე გამოაქვეყნა. ე.წ. ისლამურ სახელმწიფოს პასუხისმგებლობის მტკიცებულება არ გაუვრცელებია.
როგორც გამოცემა Reuters-ი წერს, ე.წ. ისლამურმა სახელმწიფომ მოსკოვში მომხდარ ტერაქტზე პასუხისმგებლობა საკუთარი Telegram-ის არხის საშუალებით აიღო. გამოცემა აზუსტებს, რომ ცნობა დამოუკიდებლად გადამოწმებული არ არის.
აღსანიშნავია, რომ ე.წ. ისლამურ სახელმწიფოს წარსულშიც აუღია ისეთ ტერაქტებზე პასუხისმგელობა, რომლებთანაც კავშირი არ ჰქონია.
მოსკოვში, Crocus City Hall-ის საკონცერტო დარბაზში, სულ მცირე, სამმა შეიარაღებულმა პირმა ცეცხლი გახსნა.
რუსეთი უსაფრთხოების ფედერალური სამსახურის (ФСБ) ცნობით, თავდასხმას 40 ადამიანი ემსხვერპლა, 100-ზე მეტი კი დაშავდა.
რუსეთის საგარეო საქმეთა სამინისტრომ Crocus City Hall-ში მომხდარი თავდასხმა ტერაქტად შეაფასა.
7 მარტს აშშ-ს საელჩო რუსეთში საკუთარ მოქალაქეებს პოტენციური თავდასხმის შესახებ აფრთხილებდა. საკუთარ მოქალაქეებს ასევე აფრთხილებდნენ სხვა დასავლური საელჩოებიც.
