სპეციალურმა საგამოძიებო სამსახურმა პირადი ცხოვრების ხელყოფისთვის ერთი პირი, 1987 წელს დაბადებული ო.ა. დააკავა.
"გამოძიებით დადგინდა, რომ ახალციხის მუნიციპალიტეტში მცხოვრებმა, 1987 წელს დაბადებულმა ბრალდებულმა ო. ა.-მ, ყოფილ მეუღლეს მობილური ტელეფონი წაართვა, და საკუთარ მობილურ ტელეფონში დაზარალებულის პირადი ცხოვრების ამსახველი ინტიმური შინაარსის ფოტოები გადაიტანა. აღნიშნულის შემდეგ, ყოფილ მეუღლესთან უთანხმოების გამო, შურისძიების მოტივით ინტიმური შინაარსის ფოტოები დაზარალებულის ნათესავებს Whatsapp-ის საშუალებით გადაუგზავნა.
საგამოძიებო მოქმედებების ჩატარების შედეგად, სპეციალურმა საგამოძიებო სამსახურმა ბრალდებული ო.ა. დააკავა და მას ბრალდება გენდერის ნიშნით შეუწყნარებლობის მოტივით ჩადენილი პირადი ცხოვრების საიდუმლოს ხელყოფისთვის წარედგინა" - აცხადებს საგამოძიებო სამსახური და აღნიშნავს, რომ ბრალის დამტკიცების შემთხვევაში დაკავებულს 7 წლამდე თავისუფლების აღკვეთა ემუქრება.
