რუსეთში, ჩუკოტკაში ავიაკომპანია Стриж авиа-ის Ан-2-ის ტიპის თვითმფრინავი გაუჩინარდა.
ამის შესახებ ინფორმაციას რუსული სამთავრობო მედია TACC -ი ოპერატიულ სამსახურებზე დაყრდნობით ავრცელებს.
როგორც რუსული სამთავრობო მედია წერს, ბორტზე სამი ადამიანი იმყოფება - ეკიპაჟის ორი წევრი და ერთი მგზავრი.
თვითმფრინავი პევეკიდან აფრინდა და ამავე ქალაქში უნდა დაბრუნებულიყო, თუმცა დაშვების დროს კონტაქტი ვერ დამყარდა. მოგვიანებით იმავე ქალაქიდან თვითმფრინავის მოსაძებნად Ми-8-ი სამაშველო ეკიპაჟთან ერთად გაფრინდა.
ოპერატიული სამსახურების წარმომადგენლების თქმით, ამჟამად მათთვის ცნობილია Ан-2-ის საბოლოო კოორდინატები, მაგრამ ჯერჯერობით თვითმფრინავს ვერ პოულობენ და კონტაქტის დამყარებაც ვერ ხერხდება. მათივე ინფორმაციით, ყველგანმავალი ავტომანქანებით მაშველები და მოხალისეები გაუჩინარებული თვითმფრინავის მოსაძებნად გაგზავნეს.
