იაპონიის პრემიერმინისტრმა, ფუმიო კიშიდამ განაცხადა, რომ, უკრაინის დახმარების ფარგლებში, კიევს უპილოტო საფრენი აპარატების ამომცნობ სისტემას გადასცემენ. ამ საკითხზე იაპონიის პრემიერმა NATO-ს ვილნიუსის სამიტზე ისაუბრა.
ამ წლის მარტში, როდესაც კიშიდა უკრაინაში პრეზიდენტ ვოლოდიმირ ზელენსკის შეხვდა, თქვა, რომ იაპონია, NATO-ს ნდობის ფონდის შუამავლობით, არალეტალური აღჭურვილობისთვის 30 მილიონ დოლარს გამოყოფდა. ეს სქემა გამოყენებული იქნება დრონების დამაფიქსირებელი სისტემის მიწოდებისთვის.
ამას გარდა, 12 ივლისს სამიტზე იაპონიის პრემიერმა აღნშნა, რომ ევროპისა და ინდო-წყნარი ოკეანის რეგიონის უსაფრთხოება განუყოფელია. მან ასევე გამოთქვა საკუთარი სურვილი, რომ NATO-სა და 4 პარტნიორს: იაპონიას, სამხრეთ კორეას, ავსტრალიასა და ახალ ზელანდიას შორის კავშირი გაძლიერდეს.