ფინეთის პრეზიდენტმა საული ნიინისტომ თქვა, რომ შესაძლოა დახურონ რუსული საკონსულო ალანდის არქიპელაგზე, ბალტიის ზღვაში.
გასულ კვირას რუსეთმა მოითხოვა სანქტ-პეტერბურგში ფინეთის დიპლომატიური მისიის დახურვა. საპასუხოდ, ფინეთის მთავრობამ დახურა რუსული საკონსულო მისია ტურკუში, ფინეთის სამხრეთ-დასავლეთ ნაწილში.
საჯარო ინტერესის საგანია ალანდის არქიპელაგის საკითხი, რომელიც ბალტიის ზღვაში სტრატეგიულ ადგილას მდებარეობს. ალანდის კუნძულებზე ასევე არის რუსული საკონსულო მისია, რომლის შემადგენლობაშიც მხოლოდ კონსული და მისი ცოლი შედიან.
Bloomberg-თან სატელევიზიო ინტერვიუში ფინეთის პრეზიდენტმა თქვა, რომ გადაწყვეტილება ალანდის არქიპელაგზე არსებული საკონსულოს შესახებ ჯერ არაა მიღებული. ტურკუს საკონსულო გაცილებით უფრო მასშტაბური იყო, შესაბამისად მისი დახურვა სანქტ-პეტერბურგის საკონსულოს დახურვის შემდეგ უფრო პროპორციულ ნაბიჯად მიიჩნევა.
2023 წლის 4 აპრილს ფინეთი NATO-ს 31-ე წევრი გახდა, რითიც რუსეთსა და ალიანსს შორის სახმელეთო საზღვარი 1340 კილომეტრით გაიზარდა.
