უნგრეთის საგარეო საქმეთა მინისტრის, პიტერ სიიარტოს თქმით, უკრაინის NATO-ში გაწევრიანების საკითხი ივლისში ვილნიუსის სამიტზე დღის წესრიგში არ უნდა იყოს. ამის შესახებ სიიარტო საკუთარ Facebook-ზე წერს.
"ჩვენ უნდა ვიყოთ მკაფიოები: იმ ქვეყნის NATO-ში გაწევრიანება, რომელიც ამჟამად ომშია, არ შეიძლება იყოს დღის წესრიგში". - წერს სიიარტო.
სიიარტოს მტკიცებით, ასევე არ უნდა იქნეს განხილული უკრაინის ალიანსში გაწევრიანებასთან დაკავშირებული გრაფიკი.
უნგრეთი, რომელიც როგორც ევროკავშირის, ასევე NATO-ს წევრი ქვეყანაა, არაერთხელ შეეწინააღმდეგა რუსეთის წინააღმდეგ ევროკავშირის სანქციებს და რამდენჯერმე ალიანსის მიერ უკრაინისთვის გამოყოფილი დახმარების პაკეტიც დაბლოკა. ამ მიზეზით, უნგრეთი არაერთხელ გახდა დასავლელი ქვეყნების კრიტიკის ობიექტი.
