საქართველოს პროკურატურის ინფორმაციით, კაცი, რომელმაც კახეთში 14 წლის გოგოსთან სქესობრივი კავშირი დაამყარა, გირაოთი გათავისუფლდა. მას 15 000 ლარის ოდენობით გირაო შეეფარდა. პროკურატურამ გადაწყვეტილება სააპელაციო წესით გაასაჩივრა.
ა.ნ. არასრულწლოვანთან სქესობრივი კავშირის დამყარების გამო კახეთში გუშინ, 16 მარტს დააკავეს. დაკავებულია არასრულწლოვნის ძმაც - მან გოგოზე ფიზიკურად რამდენჯერმე იძალადა.
"ი.უ. არასრულწლოვან დას სისტემატიურად აყენებდა ფიზიკურ და სიტყვიერ შეურაცხყოფას, რადგან დაზარალებული ხვდებოდა მასზე ბევრად უფროს და დაოჯახებულ მამაკაცს". – წერს პროკურატურა.
უწყების ცნობით, ა.ნ.-ს ბრალდება საქართველოს სისხლის სამართლის კოდექსის 140-ე მუხლის პირველი ნაწილით, ხოლო ი.უ.-ს 11 პრიმა 126 მუხლის მეორე ნაწილის "დ" ქვეპუნქტით და 126 პრიმა მუხლის მეორე ნაწილის "ა" ქვეპუნქტით წარედგინათ.
"პროკურატურამ ორივე ბრალდებულისთვის აღკვეთის ღონისძიების სახით პატიმრობა მოითხოვა, მოსამართლემ ი.უ-ს პატიმრობა, ხოლო ა.ნ.-ს გირაო 15 000 ლარის ოდენობით შეუფარდა. პროკურატურა არ დაეთანხმა აღნიშნულ გადაწყვეტილებას და ა.ნ.-სთვის შეფარდებული გირაო სააპელაციო სასამართლოში, მისთვის პატიმრობის შეფარდების მოთხოვნით გაასაჩივრა.
საქართველოს პროკურატურა მსგავსი კატეგორიის საქმეებზე უმკაცრეს სისხლის სამართლის პოლიტიკას ატარებს, რასაც მომავალშიც გააგრძელებს". – წერია განცხადებაში.
