ბოჭორიშვილის კლინიკის სამეთვალყურეო საბჭოს თავმჯდომარის, მაკა სოლოღაშვილის, ცნობით, ამ დროისთვის მათ კლინიკაში ახალი კორონავირუსის დადასტურებული დიაგნოზით 63 პაციენტი მკურნალობს, მათგან 13 პაციენტი საყურადღებოა, ერთის მდგომარეობა კი - მძიმეა.
"მძიმე პაციენტს არ აქვს არც ჭარბი წონა, არც სტაბილური ანამნეზი. ასაკობრივადაც არის ახალგაზრდა მამაკაცი, მაგრამ მისი მდგომარეობა დამძიმდა და გადაიყვანეს რეანიმაციაში. თითქმის ერთი კვირაა, მკურნალობს. ის თავს გრძნობს მდგომარეობის შესაბამისად", - თქვა სოლოღაშვილმა.
მისივე ინფორმაციით, კლინიკას კორონავირუსით ინფიცირებული 4 ახალი პაციენტი ჰყავს, 2 ადამიანი კი გამოჯანმრთელდა.
"არის ორი მოზარდი, ორი დედა-შვილია. ერთი დედა-შვილი გორიდანაა, მეორე დედა-შვილის ოჯახის წევრები ჩვენთან მკურნალობდნენ, ცნობილი კლასტერია. მათი ჯანმრთელობის მდგომარეობა დამაკმაყოფილებელია", - ამბობს სოლოღაშვილი ახალ პაციენტებზე.
ამ დროისთვის საქართველოში ახალი კორონავირუსის 566 შემთხვევაა დადასტურებული, საიდანაც 184 ადამიანი გამოჯანმრთელდა, 6 კი - გარდაიცვალა. 376 აქტიური შემთხვევის გარდა საქართველოს კლინიკებში დამატებით 3 ადამიანი მკურნალობს, რომლებიც საქართველოს მოქალაქეები არიან, უცხოეთში დაინფიცირდნენ და ამის შემდეგ გადმოიყვანეს საქართველოში.
