მეტრო და ავტობუსები სადეზინფექციო ხსნარით დაამუშავეს

თბილისის მერიის ინფორმაციით, კორონავირუსის გავრცელების პროფილაქტიკის მიზნით, მუნიციპალური ტრანსპორტი სპეციალური სადეზინფექციო ხსნარებით ყოველდღიურად მუშავდება. 

კახა კალაძის თქმით, შესაბამისი უწყებების რეკომენდაციები ზედმიწევნით სრულდება.

"ყოველ საღამოს, როდესაც სრულდება სამუშაო საათები, ავტობუსები ირეცხება და მუშავდება შესაბამისი ხსნარით. ასევე, დილით, ვიდრე გავლენ სამუშაოდ, ნახევარი საათით ადრე ხდება ავტობუსების დამუშავება. მსგავსი პროცესი მიმდინარეობს  ყველა მეტროსადგურში" , - ამბობს კალაძე.

მერიის ცნობით, გარდა იმისა, რომ საზოგადოებრივი ტრანსპორტი სპეციალური ხსნარებით ყოველდღიურად მუშავდება, დასუფთავება და სველი წესით დამუშავება სისტემატურად ხდება სატრანსპორტო კომპანიის მფლობელობაში არსებულ ყველა ტიპის ტრანსპორტშიც: მუნიციპალურ ავტობუსებში, მეტროსადგურებსა და მოძრავი შემადგენლობების ვაგონებში, ასევე, დამატებითი დეზინფექცია უტარდება რიყე-ნარიყალას საბაგირო გზის სადგურებსა და გონდოლებს. უწყებაში ამბობენ, რომ შესაბამისი ღონისძიებები მიკრობაკფორტეს, ლიზოფორმინის, სტერისეპტფორტეს, ბაქტიციდისა და მიროდეზ ბაზიკის სადეზინფექციო საშუალებებით სრულდება.

ამ დროისთვის საქართველოში კორონავირუსის 9 შემთხვევაა დადასტურებული, კარანტინში იმყოფება 140 ადამიანი, ხოლო სტაციონარში მეთვალყურეობის ქვეშ - 42.