იდლიბის პროვინცია

ერდოღანი: სირიის მთავრობა თურქ სამხედროებზე თავდასხმისთვის ძალიან მაღალ ფასს გადაიხდის

რეჯეფ თაიფ ერდოღანი
GETTY IMAGES

11 თებერვალს თურქეთის პრეზიდენტმა რეჯეფ თაიფ ერდოღანმა განაცხადა, რომ სირიის მთავრობა იდლიბის რეგიონში თურქ სამხედროებზე თავდასხმისთვის, სადაც 1 კვირის განმავლობაში უკვე 13 ჯარისკაცი დაიღუპა, "ძალიან მაღალ ფასს" გადაიხდიდა. 

"სირიის მხარეს ჩვენ უმაღლეს დონეზე საჭირო პასუხი გავეცით. განსაკუთრებით იდლიბში, მათ მიიღეს ის, რაც დაიმსახურეს. თუმცა, ეს საკმარისი არაა, ეს გაგრძელდება," - თქვა რეჯეფ თაიფ ერდოღანმა.

მისივე თქმით, იდლიბში შემდგომ ნაბიჯებზე დეტალურ გეგმას ხვალ, 12 თებერვალს გაამჟღავნებდა. 

სირიის ჩრდილო-დასავლეთით მდებარე მაგისტრალზე კონტროლი 2012 წლის შემდეგ პირველად ასადის რეჟიმის ძალებმა დაამყარეს. M5 მაგისტრალი ქალაქ ალეპოს დედაქალაქ დამასკოსთან აკავშირებს. მანამდე რუსეთისა და ირანის მიერ მხარდაჭერილმა ძალებმა ქალაქ ალეპოს გარეუბნებიდან ამბოხებულები გააძევეს.

პარალელურად დასრულდა მოლაპარაკებები თურქეთისა და რუსეთის წარმომადგენლებს შორის. კრემლის წარმომადგენლების თქმით იდლიბის პროვინციაში რუსეთისა და სირიის მთავრობის ძალებზე თავდასხმა უნდა შეწყდეს და რუსეთსა და თურქეთს შორის მიღწეული შეთანხმების იმპლემენტაცია დაიწყოს.

მოლაპარაკებები მას შემდეგ დაიწყო, რაც გასულ კვირას იდლიბის პროვინციაში ქალაქ სარაქებთან ასადის რეჟიმის მიერ განხორციელებულ დაბომბვას 8 თურქი სამხედროს სიცოცხლე ემსხვერპლა. თურქეთის თავდაცვის სამინისტროს ინფორმაციით თურქეთმა საპასუხო ზომები დაუყოვნებლივ მიიღო და რეგიონში რამდენიმე სამიზნე გაანადგურა.

გუშინ, 10 თებერვალს, ტაფტანაზში თურქეთში ბაზაზე თავდასხმის შედეგად კიდევ 5 თურქი ჯარისკაცი დაიღუპა. თურქეთის თავდაცვის სამინისტროს ინფორმაციით, თურქულმა მხარემ სირიის 115 სამიზნე ამოიღო, საიდანაც 101 გაანადგურა.

ერდოღანმა სირიას მოუწოდა, რომ იდლიბიდან სამხედრო ძალა თვის ბოლომდე გაეყვანა - "თუ რეჟიმი ამ დროის განმავლობაში უკან არ დაიხევს, თურქეთი ამას თავად გააკეთებს". თურქეთის საგარეო საქმეთა მინისტრმა მევლუთ ჩავუშოღლუმ კი რუსეთს მოუწოდა, რომ იდლიბის პროვინციაში სირიის რეჟიმის თავდასხმები შეეჩერებინათ.

სირიის იდლიბის პროვინციაში ამბოხებულების მიერ კონტროლირებად უკანასკნელ ტერიტორიაზე ბაშა ალ-ასადის და მისი მოკავშირეების თავდასხმას მიგრანტების ახალი ტალღის დაძვრა მოჰყვა. გაეროს ჰუმანიტარული კოორდინაციის ოფისის მონაცემებით 1 დეკემბრის შემდეგ სახლების მიტოვება 520,000-მდე ადამიანს მოუხდა, მათი 80% ქალები და ბავშვები არიან.

თურქეთის პრეზიდენტმა რეჯეფ თაიფ ერდოღანმა არაერთხელ თქვა, რომ ქვეყანა მიგრანტების ახალ ტალღას მარტო ვერ გაუმკლავდება და ევროპის ქვეყნები გააფრთხილა, რომ შედეგებს ყველა იგრძნობს.

ასადის რეჟიმმა და რუსეთმა საჰაერო თავდასხმა და სახმელეთო კამპანია ოპოზიციის უკანასკნელ პოზიციებზე გასული წლის 26 აპრილს დაიწყეს. მას შემდეგ 11,500-ზე მეტი საჰაერო თავდასხმა განხორციელდა. მათ შორის გამოიყენეს იარაღი, რომელსაც საერთაშორისო კანონმდებლობა კრძალავს. თავდასხმების სამიზნეს სამოქალაქო ობიექტები, მათ შორის სკოლები და საავადმყოფოებიც წარმოადგენდა.

რუსეთმა და თურქეთმა 2018 წლის სექტემბერში იდლიბთან დაკავშირებით ცეცხლის შეწყვეტის შეთანხმებას მიაღწიეს, რომლის მიხედვითაც ტერიტორიაზე მათ ერთობლივი პატურლირება უნდა განეხორციელებინათ და რადიკალური ელემენტებისაგან გაეთავისუფლებინათ. მიუხედავად ამისა, მას შემდეგ, რაც იანვარში ტერიტორიის ნაწილზე დაჯგუფება ჰურიათ თაჰრირ ალ-შამმა კონტროლი დაამყარა, ასადმა მოკავშირეებთან ერთად იდლიბზე თავდასხმა დაიწყო.

მონიტორიგნის ორგანიზაციების ინფორმაციით გასული წლის აპრილის შემდეგ სირიის მთავრობისა და რუსეთის შეიარაღებული ძალების მიერ ჩატარებულმა დაბომბვებმა ოპოზიციის მიერ კონტროლირებად ტერიტორიებზე 1,300-მდე ადამიანის სიცოცხლე იმსხვერპლა და მილიონამდე ადამიანს საცხოვრებლის მიტოვება მოუხდა.

ასადის ძალები იდლიბზე თავდასხმას აგრძელებენ და რამდენიმე ქალაქი აიღეს.

კომენტარები