"ჩვენი მიზანია, დეზინფორმაციას დავუპირისპიროთ ინფორმაცია, ტყუილს დავუპირისპიროთ სიმართლე" - ამის შესახებ ირაკლი კობახიძემ ქართული ოცნების აშშ-ში დაგეგმილ ვიზიტზე განაცხადა. დეპუტატები არჩილ თალაკვაძის ხელმძღვანელობით ვაშინგტონში ხვალ გაემგზავრებიან, ხოლო საგარეო საქმეთა მინისტრი დავით ზალკალიანი ამერიკაში უკვე წავიდა.
ვაშინგტონში ქართული ოცნების დელეგაცია ვიზიტი მას შემდეგ დაიგეგმა, რაც მთავრობის მეთაურმა აშშ-ის კონგრესისა და სენატის წარმომადგენლების მხრიდან არაერთი კრიტიკული წერილი მიიღო. ქართული ოცნების ერთერთი ლიდერის ირაკლი კობახიძის თქმით, საქართველოს ხელისუფლების დელეგატები ამერიკელ კონგრესმენებს და სენატორებს ინფორმაციას გაუზიარებენ და "შესაბამისად მივიღებთ შედეგს". მისი ინფორმაციით, კონგრესმენებთან ყველა თემაზე ექნებათ საუბარი, მათ შორის, საარჩევნო სისტემასა და სასამართლოზე.
"ყველა თემაზე, რომელიც არის აქტუალური ქართულ პოლიტიკაში, გაუზიარებენ ჩვენი კოლეგები ინფორმაციას ამერიკელ მეგობრებს. მოლოდინი არის ის, რომ სიმართლე გაიმარჯვებს, ეს არის მთავარი მოლოდინი, რაც შესაბამისად აისახება ჩვენი მეგობრების განწყობებში" - ამბობს კობახიძე, რომელიც ფიქრობს, რომ "ჩვენმა ოპონენტებმა დეზინფორმაცია გაუზიარეს ამერიკელ კონგრესმენებს და სამწუხაროდ, შეცდომაში შეიყვანეს ისინი, რაც აისახა წერილში".
პროპორციულ საარჩევნო სისტემაზე გადასვლის ჩაგდების შემდეგ პირველი წერილი გიორგი გახარიამ კონგრესში საქართველოს მეგობართა ჯგუფის ხელმძღვანელების, ადამ კინზინგერისა და ჯერი კონოლისგან, მიიღო. წერილში კონგრესმენები იმედს გამოთქვამდნენ, რომ ხელისუფლება დაუყონებლივ მიიღებდა პროპორციულ საარჩევნო სისტემას. ისინი წერდნენ, რომ ქართველებს სურთ მთავრობა, რომელიც უფრო მჭიდრო კავშირში იქნება დასავლეთთან და რომ საქართველოდან გავრცელებული ახალი ამბები, მთავრობის მიერ სანქცირებული ძალადობის შედეგად დემონსტრანტების, პოლიტიკოსებისა და ჟურნალისტების დაშავების შესახებ, თავზარდამცემია.
19 იანვარს გახარიას წერილით მიმართა რესპუბლიკელმა კონგრესმენმა, მარკუეინ მალინმა, და მთავრობას მოუწოდა, შეწყდეს მტრული დამოკიდებულება ამერიკული კომპანიების მიმართ. მალინი წერილში წერდა, რომ ის შეშფოთებულია საქართველოს დემოკრატიული ღირებულებებისგან განგრძობადი გადახვევითა და ეკონომიკური გაუარესებით. ამ წერილით კონგრესმენი მისი კოლეგების, კინზინგერისა და კონოლის, კრიტიკულ წერილს შეუერთდა.
მალინის წერილს მალევე, 21 იანვარს კიდევ ერთი წერილი დაემატა, რომელსაც ხელს აწერდნენ რესპუბლიკელი და დემოკრატი კონგრესმენები, ადამ კინზინგერი, ჯერი კონოლი, ელიოტ ენგელი და მაიკლ მაკკაული. წერილში კონგრესმენები შეშფოთებას გამოთქვამდნენ დემოკრატიული რეფორმის ჩაგდებისა და თანმხლები ძალადობის გამო მშვიდობიანი დემონსტრანტების წინააღმდეგ.
კონგრესმენების განცხადებით, ასევე საგანგაშოა ანაკლიის ღრმაწყლოვანი პორტის პროექტის პოლიტიზირებაც. წერილში აღნიშნული იყო, რომ ისინი შეწუხებულები არიან პროკურატურის მიერ ქართული ოცნების ოპონენტების წინააღმდეგ დაწყებული, თუ განახლებული საქმეებით.
25 იანვარს ენმ-მ გახარიას მიმართ მიწერილი კიდევ ერთი წერილი გაასაჯაროვა, რომელიც 19 დეკემბრითაა დათარიღებული. წერილის ავტორი ამჯერად ჰელსინკის კომისიის სენატორი როჯერ ვიკერი იყო. წერილში ნათქვამია, რომ ხელისუფლებამ უნდა მიიღოს მისაღები საარჩევნო სისტემა, რომელიც უზრუნველყოფს თამაში თანაბარ წესებს ყველასთვის, წინააღმდეგ შემთხვევაში - არჩევნების ლეგიტიმაცია შემცირდება.
30 იანვარს საქართველოს მთავრობას ვაშინგტონიდან მორიგი წერილი გამოუგზავნეს. ამჯერად წერილის ავტორები აშშ-ის სენატის საგარეო ურთიერთობათა კომიტეტის თავმჯდომარე ჯეიმს რიში და კომიტეტის წევრი სენატორი ჯინ შაჰინი იყვნენ, სადაც ისინი წერდნენ, რომ თუკი პროცესები საქართველოში ასე გაგრძელდება, "ამერიკა შეიძლება, იძულებული გახდეს, საქართველოსთან პარტნირობას გადახედოს".
ტეხასელ კონგრესმენს პიტერ ოლსონს მართალია გახარიასთვის წერილი არ მიუწერია, თუმცა მან Twitter-ის ოფიციალურ გვერდზე დაწერა, რომ "ქართველი ხალხი კორუმპირებულ მთავრობაზე უკეთესს იმსახურებს".
28 იანვარს კი კონგრესში სიტყვით გამოსვლის დროს ოლსონმა ბიძინა ივანიშვილი ამერიკული სატელევიზიო შოუს პერსონაჟს გრაუჩი ოსკარს შეადარა და მას ვლადიმერ პუტინის მარიონეტი უწოდა.
31 იანვარს საქართველოში მიმდინარე პროცესს კონგრესმენი უილ ჰარდიც გამოეხმაურა და დაწერა, რომ ის მოხარულია იმ ფაქტით, რომ "თავისუფლების მოყვარულ ქართველ ხალხს", რომლებიც ხელისუფლებისგან დაპირებული დემოკრატიული რეფორმის მიღებას ითხოვენ, აშშ-ის კონგრესში ორპარტიული მხარდაჭერა აქვს.
