ეროვნულ-დემოკრატიული ინსტიტუტის (NDI) ახალი კვლევის მიხედვით, პარლამენტის საქმიანობას ძალიან კარგად მოსახლეობის მხოლოდ 1% აფასებს, კარგად - 8%, საშუალოდ - 27%, ხოლო ცუდად და ძალიან ცუდად, ჯამში - 57%, დანარჩენმა არ იცის, ან უარს ამბობს პასუხზე.
წინა კვლევაში, რომელიც 2019 წლის ივლისში ჩატარდა, საკანონმდებლო ორგანოს საქმიანობას კარგად 8% აფასებდა, ხოლო უარყოფითად 42%. პარლამენტის საქმიანობის შეფასების უარყოფითი მაჩვენებელი ივლისის შემდეგ გაზრდილია, ისევე როგორც გაზრდილია მთავრობის საქმიანობის შეფასების უარყოფითი მაჩვენებელი.
NDI-ის დაკვეთით საველე სამუშაოები 19 ნოემბრიდან 13 დეკემბრის პერიოდში, საქართველოს მასშტაბით (ოკუპირებული ტერიტორიების გამოკლებით) ჩატარდა. კვლევა ეყრდნობა 2,181 პირისპირ ინტერვიუს წარმომადგენლობითი შერჩევის საფუძველზე. საშუალო ცდომილების ზღვარი 1.9%-ია.
NDI-ის კვლევები დიდი ბრიტანეთის მთავრობის UK aid-ის მხარდაჭერით ფინანსდება. საველე სამუშაოები CRRC–საქართველომ ჩაატარა.
