დემონსტრანტებმა პარლამენტთან მისასვლელი სამანქანო გზა სამშენებლო ბლოკებთ ჩახერგეს

დემონსტრანტებმა პარლამენტთან მისასვლელი სამანქანო გზა სამშენებლო ბლოკებთ ჩახერგეს.

როგორც გიორგი ვაშაძემ თქვა, ეს მათ არ მოუტანიათ და ის სამშენებლო ნაგავია, რომელიც აქ პარლამენტის გარემონტების შემდეგ დარჩა. მისივე თქმით, თბილისის მერია და მერი, კახა კალაძე ვალდებული იყო, ქალაქის ცენტრი ამ ნარჩენებისგან გაესუფთავებინა, მაგრამ ეს არ გააკეთა.

პარლამენტის შენობა რამდენიმე საათია, პიკეტირებულია. ყველა შესასვლელთან პოლიტიკურმა პარტიებმა და მოქალაქეებმა კარვები გაშალეს. ისინი აქ მთელი ღამის განმავლობაში დარჩებიან, დილით კი შეეცდებიან, ხელი შეუშალონ პარლამენტის მუშაობას.

18 ნოემბერს, 12:00 საათზე პარლამენტში რეგიონული განვითარების კომიტეტის სხდომაა ჩანიშნული, 15:00 საათზე კი - ბიუროს სხდომა.

მათვე მიიტანეს კასრები, სადაც ცეცხლს დაანთებენ და ღამით სიცივეს ასე გაუმკლავდებიან.

პიკეტირება ევროპული საქართველოს წევრებმა დაიწყეს - მათ ყველა კარი ჯაჭვით და ბოქლომებით ჩაკეტეს. თუმცა, პოლიციამ ჯაჭვი მალევე გაჭრა.

14 ნოემბერს ქართული ოცნების 40-მა დეპუტატმა მხარი არ დაუჭირა კონსტიტუციური ცვლილებების პროექტს, რომლის მიხედვითაც 2020 წლის საპარლამენტო არჩევნები პროპორციული წესით უნდა ჩატარებულიყო.

ამით ბიძინა ივანიშვილმა დაარღვია 24 ივნისს მოქალაქეებისთვის მიცემული პირობა, რომელიც მან 20-21 ივნისის - გავრილოვის ღამის და მოქალაქეების დარბევის შემდეგ დადო, ფასთომასშტაბიანი პროტესტის პასუხად.

შესაბამისად, განახლდა საპროტესტო აქციებიც.

პროტესტის მონაწილეები დაპირებული საკონსტიტუციო ცვლილების ჩაგდებას აპროტესტებენ, რომლის მიხედვით 2020 წელს პროპორციული არჩევნები უნდა ჩატარებულიყო. პროპორციული არჩევნების ჩატარების პირობა ბიძინა ივანიშვილმა ზაფხულში ანტირუსული პროტესტის ფონზე დადო.