საქართველოს პარლამენტის თავმჯდომარე პრემიერმინისტრსა და "ნაციონალური მოძრაობის" ლიდერს შორის მომხდარ სიტყვიერ დაპირისპირებას გამოეხმაურა:
"ეს ნამდვილად იყო ძალიან მძიმე პროვოკაცია, რომელიც არ შეშვენის საპარლამენტო ცხოვრებას. ასეთი ქმედებებით ჩვენ ვერ წავწევთ წინ საპარლამენტო კულტურას, პოლიტიკურ კულტურას ჩვენს ქვეყანაში და შესაბამისად, ასეთ პროვოკაციებს უნდა ჰქონდეს შესაბამისი რეაგირება."
"ჩვენ არჩევნების წინ წარვდექით კონკრეტული დაპირებებით ამომრჩევლის წინაშე, მათ შორის იყო პოლიტიკური დაპირებები და ერთ-ერთი მთავარი დაპირება მდგომარეობდა იმაში, რომ განვაცხადეთ ძალიან მკაფიოდ: არჩევნების შემდეგ "ნაციონალური მოძრაობა" აღარ იქნებოდა რისკფაქტორი ქართული დემოკრატიისთვის და ეს დაპირება, პრემიერ გიორგი კვირიკაშვილის ხელმძღვანელობით, პირნათლად შევასრულეთ, რაც არის ძალიან მნიშვნელოვანი ჩვენთვის, რაც არის ძალიან მნიშვნელოვანი ქართული დემოკრატიის შემდგომი განვითარებისთვის. მარცხთან შეგუებას სჭირდება ვაჟკაცობა და ეს ვაჟკაცობა ჩვენმა კოლეგა დეპუტატებმა ოპოზიციიდან, კონკრეტულმა კოლეგებმა, სამწუხაროდ, დღეს ვერ გამოავლინეს. თუმცა, ჩვენთვის მთავარია, რომ გავყვეთ ჩვენს დადებით დღის წესრიგს, პოზიტიურ დღის წესრიგს, რომელიც აქვს ჩამოყალიბებული უმრავლესობას, მმართველ გუნდს, საქართველოს მთავრობას და დღეს სწორედ ამ საკითხებზე უნდა ვკონცენტრირდეთ, დღეს უნდა განვიხილოთ სიღრმისეულად ის დოკუმენტი, რომელიც არის წარმოდგენილი კიდევ ერთხელ მთავრობის მიერ, კიდევ ერთხელ უნდა ვიმსჯელოთ მთავრობის შემადგენლობასთან იმ გეგმებზე, რომლებიც აქვს დასახული მმართველ გუნდს, "ქართულ ოცნებას"." განაცხადა საქართველოს პარლამენტის თავმჯდომარემ
