ცესკოს წინასწარი მონაცემებით, რომელიც ხმათა 99.92%-ს ეყრდნობა, პარტია "დავით თარხან-მოურავი, ირმა ინაშვილი - საქართველოს პატრიოტთა ალიანსი, გაერთიანებული ოპოზიცია" ხმათა 5%-ს იღებს, რაც კანონმდებლობის მიხედვით არის ის მინიმალური ბარიერი, რომლის გადალახვის შემდეგაც პარტია პარლამენტში ხვდება და მას კანონმდებლობის მიხედვით მინიმუმ 6 მანდატი ენიჭება.
თუმცა, ცესკოს მიერ გამოქვეყნებული მონაცემებით, პატრიოტთა ალიანსმა 88032 ხმა მიიღო, რაც 4.9933%-ია, ეს რიცხვი კი წესით 5%-ზე არ მრგვალდება.
საქართველოს საარჩევნო კოდექსის მიხედვით:
"საქართველოს პარლამენტის წევრთა მანდატები მიეკუთვნება მხოლოდ იმ პარტიულ სიას, რომელმაც მიიღო არჩევნებში მონაწილეთა ხმების არანაკლებ 5 პროცენტისა. არჩევნებში მონაწილეთა ხმების რაოდენობაში არ ჩაითვლება ბათილად ცნობილი ბიულეტენებით გათვალისწინებული ხმების რაოდენობა".
კოდექსის ჩანაწერი დამრგვალებას საერთოდ არ ითვალისწინებს, შესაბამისად, ნებისმიერი სახის დამრგვალება ბარიერის გადალახვის ლეგიტიმურ საფუძვლად არ უნდა ჩაითვალოს.
