ერთიანი ნაციონალური მოძრაობის აღმასრულებელმა მდივანმა სერგო რატიანმა დღეს გამართულ პრესკონფერენციაზე 2012 წელთან შედარებით გაზრდილ ხელფასებზე ისაუბრა. რატიანმა პენსიის 50-ლარიან ზრდაზე გაამახვილა ყურადღება.
"ბიძინა ივანიშვილმა და მისმა მთავრობამ არათუ წინსაარჩევნო დაპირებები ვერ შეასრულეს, ეკონომიკა წინ ვერ წაიყვანეს და დაპირებული სამუშაო ადგილები ვერ შექმნეს, არამედ 2012 წლისთვის მიღწეული ეკონომიკური მდგომარეობის შენარჩუნებაც ვერ შეძლეს. მიზეზი ივანიშვილის მთავრობის მავნებლური პოლიტიკა და "ქართული ოცნების" მაღალჩინოსანთა სიხარბეა. სახელმწიფო ბიუროკრატია, რომელიც მთავრობის წევრთა ნათესავებისა და "ქართული ოცნების" აქტივისტების ხარჯზე უზომოდ გაიზარდა, 2012 წელთან შედარებით, 456 მილიონი ლარით მეტი გვიჯდება. [თუ 2012 წელს ბიუროკრატიამ 1,202 მლრდ ლარი აიღო, 2016 წელს ეს რიცხვი 1,658 მლრდ ლარი იქნება.]
როგორც ვხედავთ, 2016 წლის ბიუჯეტის პროექტში საკმარისი რეზერვია საიმისოდ, რომ პენსია 50 ლარით გაიზარდოს. "გაზრდილი ბიუროკრატიის შემცირება, პრემიებისა და დანამატების პრაქტიკის მოსპობა, ქამრების რეალური შემოჭერა" - ესაა ჩვენი პასუხი "ქართული ოცნების" კითხვაზე, როგორ გავზარდოთ პენსია 50 ლარით.
დღეს წარმოგიდგენთ საქართველოს 10 რაიონის მონაცემებს, თუ როგორაა გაზრდილი ადგილობრივ მუნიციპალიტეტებში "ჩინოვნიკთა" რაოდენობა მთავრობის წევრთა ნათესავებისა და "ქართული ოცნების" აქტივისტების ხარჯზე. ეს რაიონებია: გურჯაანი, ლაგოდეხი, დმანისი, ქარელი, ახალქალაქი, ლანჩხუთი, ჩოხატაური, მარტვილი, მესტია, ონი, აგრეთვე, თიღვის მუნიციპალიტეტის 15 სოფელი. ერთიანმა ნაციონალურმა მოძრაობამ თითოეულ ამ რაიონში შეადარა მუნიციპალური საწარმოებისა და აიპ-ების შტატიანი და უშტატო თანამშრომლების რაოდენობა და მათ ანაზღაურებაზე დახარჯული თანხა 2012 წლისა და დღევანდელი მონაცემებით. სურათი კატასტროფულია: შესწავლილ 11 რაიონში "ჩინოვნიკთა" (აიპების თანამშრომლები) რაოდენობა 2,832-დან 3,858-მდე გაიზარდა, ხოლო შრომის ანაზღაურება გაორმაგდა: 7 მლნ-დან 14 მლნ ლარამდე. თავად აიპების რაოდენობამ 95 დან 118-მდე მოიმატა. დღეს წარმოდგენილი რაიონები მათი საერთო რაოდენობის მხოლოდ 15%-ია და შეგვიძლია, წარმოვიდგინოთ მთავრობის წევრთა ნათესავებისა და "ქართული ოცნების" აქტივისტების ხარჯზე "ჩინოვნიკთა" ზრდის მასშტაბი მთელს ქვეყანაში", - თქვა რატიანმა.
ერთიანი ნაციონალური მოძრაობა მოუწოდებს ხელისუფლებას, შეწყვიტოს ბიუროკრატიისა ზრდისა და მისი პრემიებითა და დანამატებით გამოკვების მავნე პრაქტიკა და თანხა 2016 წლის 1 იანვრიდან პენსიების 50-ლარიან ზრდაზე მიმართოს.
