დაავადებათა კონტროლის ეროვნული ცენტრი სკოლებს სანიტარული დასუფთავების რეკომენდაციით მიმართავს. ჯანდაცვის სამინისტროში ვირუსული მენინგიტის საკითხზე გუშინდელი შეხვედრის შემდეგ, დაავადებათა კონტროლის ეროვნული ცენტრის დირექტორმა ამირან გამყრელიძემ სანიტარულ-ჰიგიენური წესების დაცვის მნიშვნელობაზე გაამახვილა ყურადღება.
"ხუთი დღის განმავლობაში სკოლებს ვთხოვთ და რეკომენდაციას ვაძლევთ, გააკეთონ ე.წ. სანიტარული დასუფთავება, რაც ნიშნავს სკოლების სანიტარულ-ჰიგიენური პირობების მოწესრიგებას, ინტენსიურად, სველი წესით დალაგებას, განიავებას და ა.შ. სანიტარული დასუფთავების რეკომენდაციები დღეს ჩვენს ვებგვერდზე გამოქვეყნდება", - აღნიშნა ამირან გამყრელიძემ.
ამასთან, ჯანდაცვის სამინისტროს რეკომენდაციით, დღეიდან 26 მაისის ჩათვლით დაწყებით კლასებსა და საბავშვო ბაღებში სასწავლო და აღმზრდელობითი პროცესები შეწყდა.
გუშინ დილის მონაცემებით, ვირუსული მენინგიტის 142 შემთხვევაა დაფიქსირებული.
