თბილისის ცირკში, 15 დეკემბერს ქართული ჭიდაობის 2013 წლის სეზონის დამაგვირგვინებელი ღონისძიება - ფალავნობა 2013 გაიმართება.
ტურნირში საქართველოს ყველა რეგიონის 70-მდე სპორტსმენი ჩაერთვება. ქართული ჭიდაობის ტურნირი 4 წონით კატეგორიაში - 80, 90, 100 და მძიმე კატეგორიებში გაიმართება, რის შემდეგაც აბსოლუტური ფალავნობა ჩატარდება. ფალავნობაში მონაწილეობას აღნიშნული 4 წონითი კატეგორიის ფინალისტი და მე-3 ადგილზე გასული 12 სპორტსმენი მიიღებს.
სპორტისა და ახალგაზრდობის საქმეთა სამინისტროს ცნობით, აბსოლუტურ ფალავნობაში გამარჯვებულს პრიზად ავტომობილი - მერსედეს ML გადაეცემა. მთლიანი ტურნირის საპრიზო ფონდი ჯამში 35 000 ლარია.
ფალავნობა 2013-ში მონაწილეობას მიიღებენ ისეთი ცნობილი მოჭიდავეები, როგორებიც არიან: ადამ ოქრუაშვილი, ავთანდილ ჭრიკიშვილი, ვარლამ ლიპარტელიანი, ბექა ღვინიაშვილი და სხვები.
ფალავნობის ტურნირი 15 დეკემბერს 11:00 საათზე დაიწყება, ფინალური ორთაბრძოლები კი 17:00 საათიდან ჩატარდება.