მთავარი პროკურორი, არჩილ კბილაშვილი არასამთავრობო სექტორის წარმომადგენლებს ხვდება. შეხვედრის დაწყების წინ კბილაშვილი ჟურნალისტებს ესაუბრა. როგორც მთავარმა პროკურორმა აღნიშნა, შეხვედრის მთავარი მიზანია, არასამთავრობო სექტორმა პროკურატურას საზოგადოების კრიტიკა და შეხედულებები გაუზიაროს.
პროკურორის თქმით, გამორიცხული არ არის, რომ საჭიროების შემთხვევაში, პრეზიდენტ მიხეილ სააკაშვილის დაკითხვა მოხდეს. მისი თქმით, ''სისხლის სამართლის საპროცესო კოდექსი არ უშვებს არცერთ გამონაკლისს არცერთი თანამდებობის პირის მიმართ, დაკითხულ იქნეს მოწმის სახით, თუ არსებობს მოწმის დაკითხვის წინაპირობა''.
მთავარი პროკურორი, გრიგოლ ვაშაძის მიერ გუშინ გაკეთებულ განცხადებასაც გამოეხმაურა. კბილაშვილის განცხადებით, თუ საკითხთან დაკავშირებით ''შემოვა რაიმე ტიპის განცხადება, მოხდება მისი შესწავლა, არის თუ არა დარღვეული სისხლის სამართლის კოდექსის მოთხოვნები და აუცილებლად მოხდება შესაბამისი დასკვნის გაცემა''.
შეგახსენებთ, ექსპერტმა გია ხუხაშვილმა გუშინ, 27 მარტს, გაავრცელა 2008 წლის 27 ნოემბრით დათარიღებული წერილი, რომელითაც იმდროინდელი კულტურის მინისტრი გრიგოლ ვაშაძე რუსეთის ფედერაციის კულტურის მინისტრს ორ ქვეყანას შორის კულტურული ურთიერთობების გაღრმავების ინიციატივით მიმართავს.
ამ თემასთან დაკავშირებით გუშინვე გავრცელდა გრიგოლ ვაშაძის კომენტარი. მისი თქმით, დოკუმენტი კონფიდენციალურია და მისი გასაჯაროება დაუშვებელი იყო. ვაშაძე აცხადებს, რომ საქმეზე გამოძიება უნდა დაიწყოს, რათა დადგინდეს ვისი ბრძანებით გაიცა დოკუმენტი კულტურის სამინისტროდან საჯარო პირზე.
