საქართველოში ევროკავშირის ელჩი, ფილიპ დიმიტროვი, განათლებისა და მეცნიერების მინისტრ გიორგი მარგველაშვილს შეხვდა და აგრარული უნივერსიტეტის საკითხთან დაკავშირებით ესაუბრა. ამის შესახებ ჟურნალისტებს თავად ფილიპ დიმიტროვმა განუცხადა.
ევროკავშირის ელჩის თქმით, მარგველაშვილმა მას განუმარტა, რომ აგრარულ უნივერსიტეტში არის ''ტექნიკური პრობლემა, რომელიც შეიძლება მარტივად გადაიჭრას უახლოეს პერიოდში''.
"ეს არის უნივერსიტეტი, რომელიც საქართველოში მეექვსე ადგილზეა და როდესაც პრობლემა ჩნდება, მესმის ამხელა ინტერესი. ეს ინტერესი კიდევ უფრო ძლიერია იმ ქვეყანაში, სადაც ასეთი ძლიერი პოლარიზაციაა", - განაცხადა ფილიპ დიმიტროვმა.
მისივე თქმით, მნიშვნელოვანია, რომ უნივერსიტეტებში იყოს ''რაც შეიძლება მეტი აკადემიური დამოუკიდებლობა და შენარჩუნებული იყოს ზომიერების დონე კონკურენციის საქმეში".
შეგახსენებთ, განათლების სამინისტროსთან დღეს სტუდენტების აქცია გაიმართა, რომლებიც აგრარული უნივერსიტეტისთვის ავტორიზაციის გაუქმებას აპროტესტებდნენ. აგრარული უნივერსიტეტის სტუდენტების გარდა, აქციაში მონაწილეობდნენ სხვადასხვა არასამთავრობო ორგანიზაციების წარმომადგენლები, ასევე სხვა უმაღლესი სასწავლებლების სტუდენტები.