მარშალის ფონდში, აშშ–ში ოფიციალური ვიზიტით მყოფი საქართველოს საგარეო საქმეთა მინისტრი მაია ფანჯიკიძე ამერიკელ კონგრესმენებს და ექსპერტებს შეხვდა.
შეხვედრის დროს აშშ-ის კონგრესის გარდამავალი დემოკრატიის პროექტის ხელმძღვანელი ბრიუს ჯექსონი საქართველოში მიმდინარე დაპატიმრებების პროცესს გამოეხმაურა და განაცხადა, რომ გამოძიებების ასეთ მოკლე ვადაში დასრულება გარკვეულ ეჭვებს იწვევს.
"ცხადია, რომ 23 ადამიანის ციხეში აღმოჩენა პირველი 2 თვის განმავლობაში შეუძლებელია. გამოძიების დასრულება მოკლე პერიოდში არ არის შესაძლებელი და ის ხანდახან წლებიც გრძელდება. ბევრმა გამოცემამ, New York Times-მა, Washington Post-მა, Financial Times-მა და ამ კვირაში Economist-მაც გამოხატეს წუხილი ამ მიმართულებით. პირველ რიგში ჩვენ გვინდა ახალი მთავრობისგან დავინახოთ პასუხისმგებლობა, რომ მიჰყავს პროცესი პიროვნებების უფლებების სრული დაცვით. უცხოელ პარტნიორებს არ უნდათ კვლავ საარჩევნო რიტორიკის მოსმენა," - განაცხადა ჯექსონმა რუსთავი 2–ისთვის მიცემულ ინტერვიუში.