NDI-ს მიერ ჩატარებულმა სოციოლოგიური გამოკითხვის შედეგებმა აჩვენა, რომ გამოკითხული მოსახლეობის 88%-ისთვის ინფორმაციის მიღების პირველწყარო, პოლიტიკისა და მიმდინარე მოვლენების შესახებ ტელევიზიაა.
ინფორმაციის მიღების პირველწყაროდ ინტერნეტი 5%-მა დაასახელა, ჟურნალ-გაზეთები კი 1%-მა.
რესპონდენტთა 6%-ისთვის ტელევიზია მეორე წყაროა, ინტერნეტი ინფორმაციის მისაღებად მეორე წყაროდ 10%-მა დაასახელა, ხოლო ჟურნალ-გაზეთები 18%-მა. გამოკითხულთა 41% ინფორმაციას მხოლოდ ერთი წყაროდან იღებს.
ინტერნეტის მეშვეობით ტელეკომპანია რუსთავი 2-ს გამოკითხულთა 10% უყურებს, ტელეკომპანია იმედს 8%, მაესტროს 5%, ხოლო პირველ არხს 3%.
კითხვაზე- ბოლო სამი თვის განმავლობაში იღებდით თუ არა საკმარის ინფორმაციას მედია საშუალებებით იმ პარტიების შესახებ, რომელსაც მხარს უჭერთ, გამოკითხულთა 54% დადებითად პასუხობს, უარყოფითად უპასუხა 23%-მა, 7%-მა პასუხზე უარი განაცხადა, ხოლო 16%-ს კითხვა არ მიესადაგა (არცერთ პარტიას არ უჭერს მხარს).
NDI-ის საზოგადოებრივი აზრის კვლევა 31 ივლის-12 აგვისტოს პერიოდში ჩატარდა. მასში მონაწილეობა 2038 რესპოდენტმა მიიღო, კვლევის ცდომილება 3%-ია.
