NDI-ს მიერ ჩატარებული სოციოლოგიური გამოკითხვის შედეგების მიხედვით, გამოკითხული მოსახლეობის 48% მიიჩნევს, რომ რუსეთი რეალურ და არსებულ საფრთხეს წარმოადგენს საქართველოსთვის, 30% თვლის, რომ რუსეთი საფრთხეს წარმოადგენს, თუმცა ეს საფრთხე გაზვიადებულია, 9%-ის აზრით რუსეთი საქართველოსთვის არანაირ საფრთხეს არ წარმოადგენს, ხოლო 11%-ს კითხვაზე პასუხი არ აქვს.
რესპონდენტთა 89%-ს არ მოსწონს რუსეთთან საქართველოს ამჟამინდელი ურთიერთობა, 5%-ს მოსწონს, 5%-ს პასუხი არ აქვს.
გამოკითხულთა 68% ეთანხმება საქართველოს მთავრობის გაცხადებულ მიზანს, გახდეს ევროკავშირის წევრი, 24%-ს პასუხი არ აქვს, 5% არ ეთანხმება, ხოლო 3% პასუხზე უარს აცხადებს.
კითხვაზე- თქვენი აზრით, როდის გახდება საქართველო NATO-ს წევრი, გამოკითხულთა 57%-ს პასუხი არ აქვს, 2014 წელს ან შემდეგ-პასუხობს 26%, 7%-ის აზრით საქართველო NATO-ს წევრი მომავალ 2013 წელს გახდება, 10%-ის აზრით კი არასდროს.
NDI-ის საზოგადოებრივი აზრის კვლევა 31 ივლის-12 აგვისტოს პერიოდში ჩატარდა. მასში მონაწილეობა 2038 რესპოდენტმა მიიღო, კვლევის ცდომილება 3%-ია.