საქართველოს პარლამენტის თავმჯდომარემ, დავით ბაქრაძემ, რომელიც ამ დროისთვის სენაკში იმყოფება, მიმდინარე მოვლენების შესახებ ისაუბრა. დავით ბაქრაძის თქმით, საქართველოს მოქალაქეებს შეუძლიათ მშვიდად იყვნენ.
"ჩვენს მოქალაქეებს შეუძლიათ იყვნენ მშვიდად, იმიტომ, რომ დღეს, განსხვავებით ათი წლის წინანდელისგან და განსხვავებით იმისგან, სადაც უნდათ ზოგიერთ ჯგუფებს ჩვენი მიბრუნება, დღეს საქართველო არის სახელმწიფო, რომელსაც ჰყავს შეიარაღებული ძალები, პოლიცია, ხელისუფლება და დღეს საქართველო არის სახელმწიფო, რომელიც დაიცავს საკუთარი მოქალაქეების უსაფრთხოებას ნებისმიერ პირობებში. ამიტომ, რაც არ უნდა დიდი იყოს პრობლემა ან გამოწვევა, ჩვენს მოქალაქეებს შეუძლიათ იყვნენ მშვიდად. ქართული სახელმწიფო იცავდა და დაიცავს მათ უსაფრთხოებას", _ განაცხადა ბაქრაძემ.
შეგახსენებთ, ამ დროისათვის, საქართველო-რუსეთის საზღვარზე, დაღესტნის მონაკვეთთან აყვანილი ყველა მძევალი გათავისუფლებულია.
რაც შეეხება ინფორმაციას დაღუპულთა შესახებ, გარდაცვლილები არიან შსს-ს თანამშრომლები სოლომონ წიკლაური და არჩილ ჩოხელი, ასევე თავდაცვის სამინისტროს სამხედრო ექიმი ვლადიმერ ხვედელიძე.
შინაგან საქმეთა სამინისტრო მწუხარებას გამოთქვამს და უსამძიმრებს გარდაცვლილთა ოჯახის წევრებს.