გერმანიაში პრეზიდენტისგან ელიან განმარტებას იმასთან დაკავშირებით , მართლაც ცდილობდა თუ არა ჟურნალისტებზე ზეწოლით აღეკვეთა მისთვის არასასურველი პუბლიკაციების გამოქვეყნება .
პოპულარული გერმანული გაზეთის Bild-ის რედაქციამ დაადასტურა, რომ კრისტიან ვულფი შეეცადა გაზეთისთვის ხელი შეეშალა იმ პუბლიკაციის გამოქვეყნებაში, რომელშიც ლაპარაკია 2008 წელს , ვულფის მიერ ნაცნობი ბიზნესმენის მეუღლისგან 500 000 ევროს ოდენობის შეღავათიანი კრედიტის მიღებაზე. ( 2008 -ში ვულფი ქვემო საქსონიის მთავრობის მეთაური იყო) რედაქცია ირწმუნება, რომ დეკემბრის შუა რიცხვებში გაზეთის მთავარ რედაქტორს პირადად პრეზიდენტმა გაუგზავნა შეტყობინება, რომ პუბლიკაციის გამოქვეყნების შემთხვევაში Bild-ის წინააღმდეგ სასამართლოს მიმართავდა .
კიდევ ერთმა გაზეთმა Die Welt-მა 3 იანვარს განაცხადა , რომ 2011 წლის ზაფხულში ვულფი ცდილობდა ეიძულებინა გაზეთი არ გამოექვეყნებინა სტატია, რომელიც ეხებოდა პრეზიდენტის ბავშვობას და მის ურთიერთობას საკუთარ დასთან. გაზეთის რედაქცია ირწმუნება, რომ სტატიის ავტორი დაიბარეს პრეზიდენტის ადმინისტრაციაში , იქ კი მას პირადად პრეზიდენტმა უთხრა, რომ სტატიის გამოქვეყნებას ავტორისთვის და გაზეთისთვის არასასიამოვნო შედეგები მოჰყვებოდა. აღნიშნულის მიუხედავად Die Welt-მა სტატია გამოაქვეყნა.
გერმანულმა ტელევიზიამ ( ARD) ვულფის პრეს-მდივანზე დაყრდნობით აღნიშნა, რომ პრეზიდენტი აღიარებს ინფორმაციის თავისუფლების დიდ მნიშვნელობას გერმანული საზოგადოებისთვის .
კრისტიან ვულფი ქრისტიან-დემოკრატიული კავშირის წვერია. გერმანიის პრეზიდენტია 2010 წლიდან, მანამდე, 2003-2010 წლებში ქვემო საქსონიის პრემიერ-მინისტრი იყო.
