რადიოსადგურ „ეხო მოსკვის“ მიერ ჩატარებული გამოკითხვის შედეგად გაირკვა, რომ რადიოსადგურის მსმენელთა უმრავლესობა აფხაზეთსა და ცხინვალის რეგიონს საქართველოს ნაწილად მიიჩნევს. ”ეხო მოსკვის” ვებ გვერდზე დასმულ შეკითხვაზე: „რა არის თქვენთვის აფხაზეთი და სამხრეთ ოსეთი?“ გამოკითხულთა 54-მა პროცენტმა უპასუხა, რომ აფხაზეთი და სამხრეთ ოსეთი საქართველოს ნაწილია. გამოკითხულთა 38 პროცენტი კი მიიჩნევს, რომ აფხაზეთი და ცხინვალის რეგიონი დამოუკიდებელი სახელმწიფოებია, 6 პროცენტს კი კითხვაზე პასუხის გაცემა გაუჭირდა. ”ეხო მოსკვის” ვებ გვერდზე მიმდინარე გამოკითხვაში მონაწილეობა 10000-ზე მეტმა ადამიანმა მიიღო. აქედან 6257-მა ჩათვალა, რომ ორივე რეგიონი საქართველოს ნაწილია. 4474-ზე მეტ მსმენელს მიაჩნია, რომ ისინი დამოუკიდებელი სახელმწიფოებია. 774 ადამიანს კი კითხვაზე პასუხის გაცემა გაუჭირდა. რადიოსადგურის ვებ გვერდის პარალელურად, იმავე თემაზე გამოკითხვა ტელეფონითაც მიმდინარეობდა. სატელეფონო გამოკითხვაში მონაწილე 611-მა აბონენტმა განაცხადა რომ აფხაზეთი და ცხინვალის რეგიონი საქართველოს ნაწილებია. „ეხო მოსკვის“ ცნობით, ეს გამოკითხულთა 60 პროცენტია. სატელეფონო გამოკითხვაში მონაწილეთა 39-მა პროცენტმა კი (404 ადამიანი) მიიჩნია, რომ ეს ორი რეგიონი დამოუკიდებელი სახელმწიფოა.
