უპილოტო საფრენი აპარატების იერიშის შედეგად ორიოლისა და ნიჟნი-ნოვგოროდის ოლქებში მდებარე ნავთობსაცავებში ხანძარი გაჩნდა. ინფორმაცია თავდაპირველად ადგილობრივ ტელეგრამ-არხებზე გავრცელდა.
ტელეგრამ-არხი BAZA-ს ცნობით, ორიოლში ხანძარი 12 მარტის გამთენიისას, ადგილობრივი დროით დაახლოებით 3 საათზე გაჩნდა. ცეცხლის გაჩენამდე ადგილობრივებმა აფეთქების ხმა გაიგეს. შემდეგში ოლქის გუბერნატორმა თქვა, რომ ეს დრონის თავდასხმის შედეგი იყო. არსებული ინფორმაციით, არავინ დაშავებულა.
ამის შემდეგ ხანძარი გაჩნდა ნიჟნი-ნოვგოროდის ოლქის ქალაქ კსტოვში მდებარე ლუკოილის ნავთობობიექტში. ანონიმური ტელეგრამ-არხი 112 წერს, რომ მათი ინფორმაციით, დრონის თავდასხმის შედეგად დაზიანდა ნავთობის გამოსახდელი აპარატი. ტელეგრამ-არხი BAZA წერს, რომ ეს ადგილობრივი დროით, დაახლოებით, 6 საათზე მოხდა. წინასწარი ინფორმაციით, არავინ დაშავებულა.
ამას გარდა, მოსკოვის მერმა, სერგეი სობიანინმა თქვა, რომ ჩამოაგდეს უპილოტო საფრენი აპარატი, რომელიც მოსკოვისკენ მიფრინავდა. ტელეგრამ-არხებზე გავრცელებული ცნობების მიხედვით, აფეთქების ხმები ისმოდა კურსკის ოლქშიც.
რუსეთის თავდაცვის სამინისტრო, რომელიც ჩამოგდებული უკრაინული დრონების რაოდენობას წერს ხოლმე, ჯერჯერობით დუმს.
