ბოლო დროს გახმაურებული ფაქტების შემდეგ, კიდევ ერთხელ გაჩნდა კითხვები - რა არის სექსუალური შევიწროება, რაში გამოიხატება ის, შეიძლება თუ არა ვინმეს "დააბრალონ" და ხდება თუ არა ფლირტი დასჯადი. ტაბულა სახალხო დამცველის წარმომადგენლებს და იურისტებს ესაუბრა. ყველაზე მთავარი, რაც სექსუალური შევიწროების შემთხვევებზე საუბრისას უნდა გვახსოვდეს, არის სიტყვა "არასასურველი".

საჯარო რეესტრის თავმჯდომარეს, პაპუნა უგრეხელიძეს ყოფილი თანამშრომელი სექსუალურ შევიწროებასა და მუქარაში ადანაშაულებს. საქმე უკვე შეისწავლა სახალხო დამცველმა და დაადგინა, რომ ადგილი ჰქონდა სექსუალურ და სქესის ნიშნით  შევიწროებას. უგრეხელიძე კითხვებზე პასუხების გაცემას მივლინებიდან დაბრუნების შემდეგ გეგმავს. თუმცა, მისი არგუმენტები ომბუდსმენის დასკვნაში უკვე აისახა. მისმა უშუალო ხელმძღვანელმა, თეა წულუკიანმა კი ამ თემაზე კომენტარი მას შემდეგ გააკეთა, რაც ფაქტი მედიით გახდა საჯარო. იუსტიციის მინისტრი ამბობს, რომ "როგორც ქალმა მინისტრმა, პაპუნა უგრეხელიძეს უნდა მოუსმინოს" და პოზიციას შემდეგ დააფიქსირებს.