საქართველოს პროკურატურის ინფორმაციით, თბილისის საქალაქო სასამართლომ დამამცირებელ და არაადამიანურ მოპყრობაში, ე.წ. კანონიერ ქურდობაში, ე.წ. ქურდული სამყაროს წევრობასა და ე.წ. ქურდული სამყაროს მხარდაჭერაში ბრალდებული 5 ადამიანი დამნაშავედ ცნო. ე.წ. კანონიერ ქურდს 10-წლიანი პატიმრობა მიესაჯა, ე.წ. ქურდული სამყაროს წევრებს კი - 8-8.
უწყების ინფორმაციით, 2021 წელს ე.წ. კანონიერმა ქურდმა და ე.წ. ქურდული სამყაროს სამმა წევრმა ორ დაზარალებულს არაერთხელ მოუწყვეს ე.წ. ქურდული გარჩევა - სთხოვდნენ ფულის უმოკლეს ვადაში გადაცემას, წინააღმდეგ შემთხვევაში კი ძალადობით ემუქრებოდნენ. ერთ-ერთი გარჩევისას ე.წ. კანონიერმა ქურდმა და ე.წ. ქურდული სამყაროს წევრმა დაზარალებულს თვითდაზიანების მიყენება აიძულეს.
პროკურატურამ ე.წ. კანონიერ ქურდს ბრალდება საქართველოს სისხლის სამართლის კოდექსის 223-ე მუხლის მეორე ნაწილითა და სსკ-ის 144-ე მუხლის მე-2 ნაწილის "ე" ქვეპუნქტით წარუდგინა, რაც "კანონიერი ქურდობასა და დამამცირებელ და არაადამიანური მოპყრობას გულიხსმობს.
მეორე დაკავებულს ბრალდება სსკ-ის 223-ე მუხლის პირველი ნაწილით და სსკ-ის 144-ე მუხლის მე-2 ნაწილის "ე" ქვეპუნქტით წარედგინა, რაც "ქურდული სამყაროს" წევრობასა და დამამცირებელ და არაადამიანურ მოპყრობას ითვალისწინებს.
ასევე, პროკურატურამ 3 პირს ბრალი სსკ-ის 223-ე მუხლის პირველი ნაწილით წარუდგინა, რაც "ქურდული სამყაროს" წევრობას გულიხსმობს.
რაც შეეხება კიდევ ერთ ბრალდებულს - ე.წ. "ქურდული სამყაროს" წევრს, განცხადების მიხედვით, სასამართლოს გადაწყვეტილებით, მისი ქმედება დაკვალიფიცირდა სსკ-ის 223-ე მუხლის მეორე ნაწილით, რაც "ქურდული სამყაროს" საქმიანობის მხარდაჭერას გულისხმობს და სასჯელის სახით 4 წლით თავისუფლების აღკვეთა განესაზღვრა.
"დასაბუთებული სასამართლო განაჩენის მიღების შემდგომ, ბრალდების მხარე თბილისის საქალაქო სასამართლოს გადაწყვეტილებას ზემოაღნიშნული მსჯავრდებულის ნაწილში თბილისის სააპელაციო სასამართლოში გაასაჩივრებს". - ვკითხულობთ განცხადებაში.
